काठमाडौं। सांसदहरुलाई संसदीय प्रक्रिया र अभ्यास, कानुन निर्माणको विधि लगायत विषयमा अभिमुखीकरण कार्यक्रम सञ्चालन गरिएको छ।
संघीय संसद् सचिवालयले प्रतिनिधि सभाका सदस्यहरुलाई अभिमुखीकरण कार्यक्रम सञ्चालन गरेको हो।
संसद् सचिवालयका पूर्वमहासचिव भरतराज गौतमले संसदीय मर्यादा, प्रक्रिया र अभ्यास, पूर्वसचिव तोयानाथ अधिकारीले कानुन निर्माण प्रक्रिया र संसद् सचिवालयका पूर्वसचिव ध्रुवराज घिमिरेले संसदीय समिति प्रणाली र संसदीय निगरानीबारे प्रशिक्षण दिने तालिका छ।
दुई दिने अभिमुखीकरण कार्यक्रम शुभारम्भ गर्दै सभामुख डीपी अर्यालले सांसदहरुले आफ्नो कामप्रति थप जिम्मेवार बन्नुपर्ने बताएका छन्। उनले सांसदका काम, व्यवहार र शैलीलाई जनताले विभिन्न माध्यमबाट नियालिरहेकाले जिम्मेवार हुन आग्रह गरेका हुन्।
उनले कानुन निर्माणमा जनप्रतिनिधिले विगतका राम्रा अभ्यासबाट सिक्नुपर्ने उल्लेख गर्दै अध्ययनशील र प्रविधिमैत्री हुन सुझाव दिए।
‘अहिले प्रतिनिधि सभामा धेरै नयाँ अनुहार हुनुहुन्छ। संसदीय विधि र प्रक्रियालाई थप बुझाउन तथा सांसदका काम अझ प्रभावकारी बनाउन यो कार्यक्रम आयोजना गरिएको हो,’ सभामुख अर्यालले भने, ‘संसदीय प्रक्रिया र विधिमा अब्बल बन्नका लागि यो सिकाइ उपलब्धिमूलक हुने विश्वास लिएको छु।’
