काठमाडौं। उत्पादन तथा प्रशोधन क्षेत्रका कम्पनीले व्यापार बढाएका छन्। जसले गर्दा ती कम्पनीको नाफामा सुधार देखिएको छ। नेपाल स्टक एक्सचेन्जमा सूचीकृत उत्पादन तथा प्रशोधन क्षेत्रका अधिकांश कम्पनीले व्यापार बढाएर आफ्नो ब्यालेन्स सिट सुधार गरेका हुन्।

आर्थिक वर्ष २०८२/८३ को तेस्रो त्रैमाससम्म सर्वोत्तम सिमेन्ट, हिमालयन डिष्टिलरी, शिवम् सिमेन्ट, बोटलर्स नेपाल बालाजु, सोनापुर मिनरल्स आयल र बोटलर्स नेपाल तराईले नाफा बढाएका छन्। वित्तीय लागत घट्दा र व्यापार बढ्दा ब्यालेन्स सिटमा सुधार देखिएको हो।

ओम मेगाश्री फर्मास्युटिकल्स, सागर डिष्टिलरी र घोराही सिमेन्ट भने नोक्सानीमा छन्। घोराही सिमेन्टले व्यापार बढाएर नोक्सानी घटाएको छ। कम्पनीको वित्तीय स्थिति पोहोरभन्दा सुध्रिएको छ।

युनिलिभर नेपालको नाफामा सामान्य गिरावट आएको छ। कम्पनीको नाफा यो वर्ष ९ महिनामा ६ प्रतिशतले घटेको छ। रिलायन्स स्पिनिङ मिल्स र एसवाइ प्यानलको नाफा घटेको छ।

नेप्सेमा सूचीकृत उत्पादन तथा प्रशोधन क्षेत्रका कम्पनीको दुई आर्थिक वर्षको तेस्रो त्रैमाससम्मको वित्तीय अवस्था

मुनाफा सबैभन्दा धेरै बढाउनेमा बोटलर्स नेपाल बालाजु छ। उसले करिब १३ गुणाले मुनाफा बढाएको हो।

मुनाफा धेरै गर्नेमा भने सर्वोत्तम सिमेन्ट छ। यो कम्पनीले ९ महिनामा ९० करोड रुपैयाँ मुनाफा कमाएको छ। कम्पनीले पोहोर तेस्रो त्रैमासको तुलनामा नाफा ५० प्रतिशत वृद्धि गरेको हो।

गत वर्ष ९ महिनामा सर्वोत्तम सिमेन्टले ६० करोड ३० लाख रुपैयाँ नाफा कमाएको थियो। सर्वोत्तमले ९ अर्ब रुपैयाँको व्यापार गरेको छ। यो पोहोर ९ महिनाको तुलनामा ३ प्रतिशत बढी हो।

बैंकको ब्याजदर निरन्तर घटेको प्रभाव कम्पनीहरुको ब्यालेन्स सिटमा देखिएको छ। ब्याजदरमा गिरावटले कम्पनीहरुको वित्तीय लागत घटेको छ।

नेप्सेमा सूचीकृत उत्पादन तथा प्रशोधन क्षेत्रका कम्पनीको दुई आर्थिक वर्षको तेस्रो त्रैमाससम्मको वित्तीय अवस्था