काठमाडौं। रिलायन्स स्पिनिङ मिल्सको सेयर भाउ दोस्रो बजारमा १३ कारोबार दिनपछि बल्ल आइपीओको मूल्य भन्दा माथि पुगेको छ।

कम्पनीको सेयर भाउ १३ कारोबार दिनपछि बिहीबार अपराह्न १ बजे प्रति कित्ता ८३४ रुपैयाँ पुगेको छ। सर्वसाधारण लगानीकर्ताले खरिद गरेको आइपीओ मूल्यभन्दा यो करिब १४ रुपैयाँ बढी हो।

बुक बिल्डिङ विधिमार्फत आइपीओ निष्कासन गरेको रिलायन्सले सर्वसाधारणलाई प्रति कित्ता ८२०.८० रुपैयाँमा आइपीओ बिक्री गरेको थियो।

बिहीबार कम्पनीको सेयर मूल्य प्रति कित्ता २२ रुपैयाँ बढ्दा ७० कित्ता सेयर किनबेच भएको छ। कम्पनीको सेयर दोस्रो बजारमा कारोबारपछि फागुन २५ गते बाहेक १२ दिन वृद्धि भएको छ।

बिहीबारको सेयर कारोबारलाई समेत हिसाब गर्ने हो भने रिलायन्सको ८७० कित्ता सेयर आइपीओभन्दा कम मूल्यमा बिक्री भएको छ। अर्थात, प्रति कित्ता ८२० रुपैयाँमा किनेको सेयर लगानीकर्ताले नोक्सानी खाएर बेचेका छन्। रिलायन्सको ८७० कित्ता सेयर बजारमा ४ लाख १२ हजार रुपैयाँमा कारोबार भएको देखिन्छ।

कम्पनीको सेयर मूल्यमा ४ दिन मात्रै पोजेटिभ सर्किट लागेको छ। दोस्रो बजारमा रिलायन्सको पहिलो कारोबार प्रति कित्ता ३०० रुपैयाँबाट सुरु भएको थियो।

नेटवर्थ विवादका कारण नेपाल स्टक एक्सचेन्जले कम्पनीलाई चुक्ता मूल्यको तीन गुणासम्म ओपनिङ रेन्ज दिएको थियो।