काठमाडौं। सेयर बजारमा सामूहिक लगानी कोष(म्युचुअल फण्ड)को कारोबार सुस्ताएको छ। सार्वजनिक निष्कासनपछि नेप्सेमा सूचीकृत भएर कारोबारमा आएका म्युचुअल फण्ड लगानीकर्ताको रोजाइमा पर्न छोडेका छन्।

अधिकांश म्युचुअल फण्डको सम्पत्तिको मूल्य (नेट भ्यालु एसेट)मा गिरावट आएको छ। नेप्सेमा ३७ वटा बन्दमुखी म्युचुअल फण्ड सूचीकृत रहेकामा २६ वटाको न्याभ १० रुपैयाँभन्दा कम छ।

म्युचुअल फण्ड निष्कासन तथा बिक्री प्रबन्धकहरु लगानीका उपकरण धेरै भएका कारण लगानीकर्ताले किनबेचमा चासो दिन छोडेको बताउँछन।

‘म्युचुअल फण्डमै पनि ओपन इन्डेड योजना आउनेक्रम बढ्दो छ। लामो अवधिका लागि लगानी गर्नेहरु त्यतातिर गइरहेको देखिन्छ। क्लोज इन्डेडमा लगानी गरेकाहरुले लाभांशका लागि होल्ड गरेर राखेका छन्,’ एक मर्चेन्ट बैंकका सीइओले भने, ‘बजारमा लगानी विविधिकरण छ। सूचीकृत कम्पनीको सेयर, ऋणपत्र लगायत उपकरण छन्। लगानी गर्न खजिरहेकाहरु त्यतातिर गए।’

म्युचुअल फण्डको इकाईको एक वर्षको उच्च र न्यून मूल्य

सार्वजनिक निष्कासनभन्दा दोस्रो बजारमा ईकाइ मूल्य निकै सस्तो हुँदा समेत म्युचुअल फण्डमा लगानीकर्ताको चासो देखिंदैन।

अहिले एनआईबिएल समृद्धि फण्ड-२ को न्याभ सबैभन्दा न्यून ८.३७ रुपैयाँ छ। म्युचुअल फण्डले प्रति इकाई मूल्य १० रुपैयाँमा सार्वजनिक निष्कासन गर्दै आएका छन्।

प्रभु स्मार्ट फण्डको न्याभ सबैभन्दा धेरै ११.२२ रुपैयाँ छ। पछिल्लो समय म्युचुअल फण्डको न्याभ निरन्तर ओरालो लागिरहेको छ।

म्युचुअल फण्डले अहिले लगानीको उपकरण खोजिरहेको मर्चेन्ट बैंकरहरु बताउँछन्। बैंकहरुको मुद्दती निक्षेपको ब्याजदर निरन्तर ओरालो लाग्दा सेयर बजारमा लगानी बढाएका मर्चेन्ट बैंकरलाई बजारबाट पनि धक्का लागेकाले आम्दानीमा गिरावट आएको छ।

म्युचुअल फण्डहरु अहिले लाभांशको दबाबमा रहेको नबिल इन्भेष्टमेन्ट बैंकिङमा सीइओ मनिषनारायण जोशीले बताए।

‘बैंकको ब्याजदर घट्दा त्यसबाट हुने आम्दानी घटेको छ। बजारबाट पनि अपेक्षितरुपमा प्रतिफल प्राप्त हुन सकेको छैन,’ उनले भने, ‘न्याभको सम्बन्ध सिधै बजारको उतारचढावसँग हुन्छ। पछिल्लो समय सेयर बजार पनि घटेको छ। खासमा अहिले योजनाहरु सन्तुलित प्रतिफलको दबाबमा छन्।’