काठमाडौं। लाइफ इन्स्योरेन्सको व्यवसाय वृद्धि हुँदा निर्जीवन बीमा कम्पनीको भने घटेको छ। चालु आर्थिक वर्ष ९ महिनामा जीवन बीमा कम्पनीले बीमा शुल्क १५.३५ प्रतिशतले वृद्धि गरेका छन्।

गत आर्थिक वर्ष चैतसम्म माइक्रो इन्स्योरेन्स सहित १७ वटा लाइफ इन्स्योरेन्सले १ खर्ब १० अर्ब १६ करोड रुपैयाँ प्रिमियम आर्जन गरेकामा यस वर्ष सोही अवधिमा १ खर्ब २७ अर्ब रुपैयाँ संकलन गरेका छन्।

लाइफ इन्स्योरेन्सको प्रथम बीमा शुल्क १५.५३ प्रतिशतले वृद्धि भएर २४ अर्ब ८८ करोड रुपैयाँ पुगेको छ। गत वर्ष यही अवधिमा लाइफ इन्स्योरेन्सले २१ अर्ब ५४ करोड रुपैयाँ प्रथम बीमा शुल्क आर्जन गरेका थिए।

सक्रिय बीमा लेखको संख्या १ करोड ४४ लाख पुगेको छ। नेपाल बीमा प्राधिकरणका अनुसार सबै जीवन कम्पनीले व्यवसाय बढाएका छन्।

जीवन बीमा कम्पनीको प्रिमियमको तुलनात्मक अवस्था

निर्जीवन बीमा कम्पनीको व्यवसाय भने २०.८६ प्रतिशतले ओरालो लागेको छ। कम्पनीको नयाँ व्यापारमा गिरावट आउँदा प्रिमियम घटेको हो।

चारवटा लघुसहित डेढ दर्जन निर्जीवन बीमा कम्पनीले यो आर्थिक वर्ष चैतसम्म ३२ अर्ब ८१ करोड रुपैयाँ प्रिमियम संकलन गरेका छन्। कम्पनीहरुले पोहोर ९ महिनामा ४१ अर्ब ४६ करोड रुपैयाँ प्रिमियम संकलन गरेका थिए।

निर्जीवन बीमा कम्पनीले यो अवधिमा २४ लाख १२ हजार बीमा लेख जारी गरेका छन्। यो संख्या पोहोरको तुलनामा १८.९७ प्रतिशत कम हो। सबै निर्जीवन बीमा कम्पनीको प्रिमियम घटेको छ। प्रिमियम संकलन सबैभन्दा धेरै युनाइटेड अजोड इन्स्योरेन्सको घटेको छ।

निर्जीवन बीमा कम्पनीको प्रिमियमको तुलनात्मक अवस्था