काठमाडौं। राष्ट्रिय वाणिज्य बैंकले आइतबारदेखि ऋणपत्र निष्कासन गर्ने भएको छ। बैंकले २ अर्ब ५० करोड रुपैयाँ बराबरको २५ लाख कित्ता ऋणपत्र निष्कासन गर्ने भएको हो।
७ वर्ष अवधिको ऋणपत्रमा ७ प्रतिशत ब्याजदर तोकिएको छ। बैंकले कुल निष्कासनमध्ये ६० प्रतिशतले हुन आउने १ अर्ब ५० करोड रुपैयाँ बराबरको १५ लाख कित्ता व्यक्तिगत र ४० प्रतिशतले हुन आउने १ अर्ब रुपैयाँ बराबरको १० लाख कित्ता सर्वसाधारणका लागि निष्कासन गर्नेछ।
सर्वसाधारणका लागि छुट्याएको ऋणपत्रमध्ये ५० हजार कित्ता सामूहिक लगानी कोषलाई छुट्याइएको छ। बाँकी ९ लाख ५० हजार कित्ता ऋणपत्रमा सर्वसाधारणले आवेदन दिन सक्नेछन्।
अंकित मूल्य १००० रुपैयाँ दरको ऋणपत्रमा लगानीकर्ताले २५ देखि सम्पूर्ण कित्ताका लागि आवेदन दिन सक्नेछन्। बैंकको ऋणपत्र निष्कासन छिटोमा वैशाख १० र ढिलोमा २१ गते बन्द हुने बिक्री प्रबन्धकले जनाएको छ।
बैंकको धितोपत्र बिक्री प्रबन्धकमा सानिमा क्यापिटल छ।
