नेपाल फुटबल लिग खेल्न २० वटा प्रस्ताव, पुराना सातसँगै नयाँ तीन टोली थपिने

बिजमाण्डू
२०८३ मंसिर ५ गते १०:०९ | Nov 21, 2026
नेपाल फुटबल लिग खेल्न २० वटा प्रस्ताव, पुराना सातसँगै नयाँ तीन टोली थपिने

काठमाडौं। नेपाल फुटबल लिग (एनएफएल) मा तीन नयाँ टोली थप्न आह्वान गरिएको बोलपत्रमा २० वटा प्रस्ताव परेको आयोजकले जनाएको छ। त्यसमध्ये छनौट हुने तीन टिमले मात्रै लिग खेल्न पाउनेछन्।

GBIME
Tata

नेपाल सुपर लिग (एनएसएल) खेल्ने क्लबहरु मिलेर अघिल्लो महिनामात्रै आफ्नै लिग (एनएफएल) खेल्ने घोषणा गरेका थिए। ललितपुर सिटी एफसीका अध्यक्ष कल्याण गुरुङको अध्यक्ष बनाएर नयाँ लिगको घोषणा गरिएको थियो।

‘आठ सहर लक्षित गरी खोलिएको बोलपत्रमा २० वटा प्रस्ताव प्राप्त भएको छ। पेश गरिएका बिडिङ रकम, व्यावसायिक तथा वित्तीय पृष्ठभूमि, सामाजिक विश्वसनीयता र १० वर्षको क्लब सञ्चालन योजनाको आधारमा तीन टोली छनोट गरिनेछ।’ एनएफएलका कमिश्नर राजु घिसिङले भने।

नयाँ टोलीका लागि विराटनगर, धरान, जनकपुर, वीरगन्ज, हेटौँडा, भक्तपुर, नेपालगन्ज र सुर्खेतका लागि प्रस्ताव माग गरिएको थियो।

घोषणा गरिएको सात वर्षमा तीनपल्ट आयोजित नेपाल सुपरलिग (एनएसएल) छाडेका ७ क्लब काठमाडौं रेजर्स, ललितपुर सिटी, एफसी चितवन, पोखरा थन्डर्स, बुटवल लुम्बिनी, धनगढी एफसी र झापा एफसी एनएफएलका संस्थापक हुन्। यी सात क्लब र नयॉ तीन टिमसहित १० टोलीले ‘होम एन्ड अवे’को आधारमा एनएफएलमा प्रतिस्पर्धा गर्नेछन्। पहिलो संस्करण फागुन १ गते सुरु हुनेछ।