काठमाडौं। वाणिज्य बैंकहरुले नाफा बढाएका छन्। चालु आर्थिक वर्ष पहिलो महिना साउनमा वाणिज्य बैंकहरुको नाफा ४.२२ प्रतिशतले बढाएर ८ अर्ब ७३ करोड रुपैयाँ कमाएका हुन्।

पोहोर सोही अवधिमा वाणिज्य बैंकहरुले ८ अर्ब ३८ करोड ३० लाख रुपैयाँ खुद नाफा गरेका थिए। कष्ट अफ फण्ड घटेर ब्याज आम्दानी बढ्दा बैंकहरुको नाफामा सुधार भएको हो। साउनमा १३ वटा बैंकले नाफा बढाएका छन्। ७ वटाको नाफा भने खुम्चिएको छ।

कृषि विकास बैंकको नाफा १०७ गुणाले बढेको छ। नबिल बैंकले सबैभन्दा धेरै ८८ करोड ३१ लाख खुद नाफा गरेको छ।

त्यसैगरी, ग्लोबल आइएमई बैंकले ८१ करोड ३६ लाख र नेपाल इन्भेष्टमेन्ट मेगा बैंकले ७३ करोड ४४ लाख रुपैयाँ खुद नाफा गरेका छन्।

नेपाल बैंक, राष्ट्रिय वाणिज्य बैंक, स्टान्डर्ड चार्टर्ड बैंक, हिमालयन बैंक, एनआइसी एसिया बैंक र सानिमा बैंकको नाफा भने खुम्चिएको छ।