द हेग (नेदरल्यान्ड्स)। विश्वमा राजनीतिक अस्थिरता बढिरहेका बेला संकटको सामना गर्ने तयारीस्वरूप नेदरल्यान्ड्सको केन्द्रीय बैंकले उत्तर अमेरिकामा रहेको आफ्नो सुन भण्डारको ठूलो हिस्सा लन्डन सारेको छ।
नेदरल्यान्ड्सको केन्द्रीय बैंकले बुधबार जनाएअनुसार मार्चदेखि अगस्टसम्म न्युयोर्क र क्यानडाको ओटावामा रहेको करिब ८६ मेट्रिक टन सुन लन्डन स्थानान्तरण गरिएको हो। न्युयोर्क र ओटावामा गरी बैंकको करिब ३१३ मेट्रिक टन सुन थियो।
नेदरल्यान्ड्सको कुल सुन भण्डारमध्ये ३१.३ प्रतिशत न्युयोर्क र १९.७ प्रतिशत ओटावामा थियो। स्थानान्तरणपछि दुवै सहरमा रहेको सुनको हिस्सा घटेर १८.५ प्रतिशतमा आएको बैंकले जनाएको छ। नेदरल्यान्ड्सको केन्द्रीय बैंकसँग कुल ६१२.४ मेट्रिक टन सुन छ। सन् २०२५ को अन्त्यसम्म यसको मूल्य ७२.२ अर्ब युरो अर्थात् करिब ८३.६ अर्ब अमेरिकी डलर बराबर थियो।
बैंकका गभर्नर ओलाफ स्लेइपेनले सुन स्थानान्तरणलाई संकटको तयारी र बैंकको प्रतिरोधात्मक क्षमता बलियो बनाउने कदमका रूपमा व्याख्या गरेका छन्। ‘यो स्थानान्तरणबाट हाम्रो सुन भण्डारको कारोबारयोग्यता बढेको छ। हामीले यी सुनका भण्डार कहिल्यै प्रयोग गर्न नपरोस् भन्ने अपेक्षा गरेका छौँ। तर हाम्रो प्रतिरोधात्मक क्षमता र संकटको तयारीलाई बलियो बनाउन आवश्यक छ,’ उनले लिखित वक्तव्यमा भनेका छन्।
केन्द्रीय बैंकका अनुसार २७ मेट्रिक टनभन्दा बढी सुन अमेरिका र क्यानडाबाट नेदरल्यान्ड्सको केन्द्रीय बैंकको कडा सुरक्षा रहेको भल्टमा भौतिक रूपमा स्थानान्तरण गरिएको छ। उक्त भल्ट देशको मध्यभागमा रहेको जाइस्टनजिकैको एक सैन्य आधार क्षेत्रमा छ।
यद्यपि सुनका ती बारहरू कसरी एटलान्टिक महासागर पार गरेर नेदरल्यान्ड्स पुर्याइयो भन्नेबारे बैंकले विस्तृत जानकारी दिएको छैन। जाइस्टबाट पनि करिब त्यति नै परिमाणको सुन लन्डन सारिएको बैंकले जनाएको छ। बाँकी सुन भने प्रत्यक्ष रूपमा स्थानान्तरण गरिएको होइन। न्युयोर्कमा रहेको करिब ५९ मेट्रिक टन सुन बिक्री गरेर त्यसबाट प्राप्त रकमले लन्डनमा त्यति नै परिमाणको सुन खरिद गरिएको हो।
नेदरल्यान्ड्सको केन्द्रीय बैंक, डीएनबीका अनुसार लन्डनस्थित बैंक अफ इंग्ल्यान्डमा राखिएको सुनले आधुनिक अन्तर्राष्ट्रिय कारोबारका मापदण्ड पूरा गर्छ। यस्तो सुन विश्वमै सबैभन्दा सहज रूपमा कारोबार गर्न सकिने सुनका रूपमा मानिन्छ।
त्यसैले संकटका बेला लन्डनमा रहेको सुन डीएनबीका लागि सबैभन्दा छिटो र प्रत्यक्ष रूपमा उपयोग गर्न सकिने बैंकले जनाएको छ।
यसको तुलनामा न्युयोर्क र ओटावामा राखिएको सुनलाई संकटको अवस्थामा त्यति छिटो र प्रत्यक्ष रूपमा परिचालन गर्न नसकिने उसको भनाइ छ। डीएनबीले राजनीतिक तथा आर्थिक अस्थिरताको समयमा सुन भण्डारलाई सहज रूपमा परिचालन गर्न सकिने स्थानमा राख्नु आफ्नो संकट व्यवस्थापन रणनीतिको हिस्सा भएको जनाएको छ।
‘बैंक अफ इंग्ल्यान्डमा राखिएको सुनले आधुनिक अन्तर्राष्ट्रिय व्यापारका मापदण्ड पूरा गर्छ र यसलाई विश्वमै सबैभन्दा सहज रूपमा कारोबार गर्न सकिने सुनका रूपमा हेरिन्छ। त्यसैले संकटको अवस्थामा डीएनबीका लागि यो सुन सबैभन्दा छिटो उपलब्ध हुन सक्छ। न्युयोर्क र ओटावामा राखिएको सुन भने त्यस्तो अवस्थामा त्यति छिटो र प्रत्यक्ष रूपमा प्रयोग गर्न सकिँदैन,’ बैंकले जनाएको छ। (एपी)
