विराटनगर। सीमावर्ती जोगबनी भन्सार कार्यालयमा कार्यरत क्लियरिङ एजेन्टले विराटनगर नाकाबाट हुने आयात निर्यात सोमबारदेखि ठप्प पारेका छन्।
त्यहाँका क्लियरिङ एजेन्टले ल्यान्ड पोर्ट अफ इन्डिया (एलपीआई)को कार्यसम्पादन र सीमा सुरक्षा बल (एसएसबी)को व्यवहारप्रति आपत्ति जनाउँदै पेनडाउन गरेर आयात निर्यात ठप्प पारेका हुन् । एलपीआई भारतको सरकारी निकाय हो।
एजेन्टको पेनडाउनका कारण नेपालतर्फ आइरहेका ५ सयभन्दा बढी ट्रक र कन्टेनर सीमापारि नै रोकिएका छन्। विराटनगर भन्सारबाट हुने जाँचपासको प्रक्रिया पनि अवरूद्ध भएको छ।
जोगबनीस्थित एलपीआईका प्रबन्धक रत्नाकर यादवले एजेन्टले कुनै मागपत्र र अल्टिमेटम नदिई एकाएक काममा अवरोध सिर्जना गरेको बताए।
‘उहाँहरूको माग के हो, हामीसामु आइपुगेको छैन। एक्कासि पेनडाउन भन्ने सुनियो र काम रोकिएको छ। के कारणले हो हामीले बुझ्न सकेनौं। कुनै मागपत्र दिएका छैनन्,’ प्रबन्धक यादवले भने।
पेनडाउनमा संलग्न क्लियरिङ एजेन्ट लक्ष्मण यादवले एलपीआईका प्रबन्धक र एसएसबीले गरेको दुर्व्यवहारका कारण पेनडाउनमा उत्रन बाध्य भएको बताए।
‘एलपीआईका प्रबन्धकदेखि त्यहाँका कुनै पनि कर्मचारीले एजेन्ट र व्यवसायीसँग मर्यादापूर्वक कुरा गर्दैनन्। अत्यन्तै हेपेर कुरा गर्छन् र नराम्रो व्यवहार देखाउँछन्। त्यस्तै एसएसबीका प्रहरीको व्यवहार पनि राम्रो र मानवीय छैन,’ एजेन्ट लक्ष्मणले भने।
उनका अनुसार कार्यालयमा काम ढिलो हुन्छ। सर्भर डाउन भन्दै कर्मचारीले समयमा जाँचपास गर्दैनन्। यसका कारण ३ दिनसम्मको गाडीको पार्किङ शुल्क तिर्नुपर्छ। ‘पटक पटक अनुरोध गर्दा गर्दा केही नलागेपछि हामी हड्तालमा उत्रेका हौं,’ लक्ष्मणले भने।
