काठमाडौं। वीरगंजबाट चार युवक स्रोत नखुलेको नगद ५२ लाख ५० हजार रुपैयाँसहित पक्राउ परेका छन्। जिल्ला प्रहरी कार्यालय पर्साको टोलीले उनीहरुलाई पक्राउ गरेको हो।
सोमबार राति वीरगंज-१० आदर्शनगरबाट पक्राउ पर्नेमा भारतीय नागरिक २६ वर्षीय सुरज कर्ण, बाराका ३२ वर्षीय उपेन्द्र साह, २६ वर्षीय सागरकुमार सर्राफ र पर्साका २५ वर्षीय राहुलकुमार गुप्ता छन्।
प्रहरीका अनुसार राति दुई मोटरसाइकलमा आएका उनीहरुलाई जाँच गर्दा रकम फेला परेको थियो। उनीहरुले रकमको विश्वस्त स्रोत बताउन सकेनन्।
बरामद रकममा एक हजार, सय र ५० दरका नोट छन्। रकम, मोटरसाइकलसहित चारै जनालाई नियन्त्रणमा लिएर अनुसन्धान भइरहेको प्रहरीले जनाएको छ।
