काठमाडौं। राष्ट्रिय व्यावसायिक पहल (एनबीआइ)ले पूर्वी नेपाल तथा मधेशमा भइरहेको सामाजिक द्वन्द्वप्रति गम्भीर चिन्ता व्यक्त गरेको छ।
एनबीआइले विज्ञप्ति जारी गर्दै सम्पूर्ण पक्षलाई संयमता, संवाद र सहिष्णुताका साथ अघि बढ्न आग्रह गरेको छ।
‘शान्ति नै समृद्धिको आधार हो। तराई-मधेशसहित देशभरका सबै नागरिक, समुदाय, सामाजिक तथा राजनीतिक नेतृत्व, व्यवसायी, युवा, नागरिक समाज, सञ्चार माध्यम तथा सम्पूर्ण नेपालीलाई धार्मिक सद्भाव, सामाजिक एकता र स्थायी शान्ति कायम गर्न एनबीआइ हार्दिक अपिल गर्दछ,’ विज्ञप्तिमा भनिएको छ।
विवादको समाधान संवाद र लोकतन्त्रिक प्रक्रियाबाट खोज्नुको विकल्प नभएको एनबीआइले उल्लेख गरेको छ। हिंसा, बन्द र अशान्तिले व्यवसाय, रोजगारी र अर्थतन्त्रमा गम्भीर असर पार्ने एनबीआइको भनाइ छ।
शान्तिपूर्ण सामाजिक सद्भाव, सुरक्षित व्यावसायिक वातावरण र दिगो आर्थिक विकासका लागि राष्ट्रिय एकता अपरिहार्य भएको एनबीआइले स्पष्ट पारेको छ।
