काठमाडौं। नर्वेलाई हराउँदै इङ्ग्ल्याण्ड विश्वकपको सेमिफाइनलमा पुगेको छ। फिफा विश्वकप २०२६ को क्वार्टरफाइनलमा नर्वेलाई अतिरिक्त समयमा २-१ गोलले हराउँदै इङ्ग्ल्याण्ड सेमिफाइनल पुगेको हो।
एक गोलले पछि रहेको इङ्ग्ल्याण्डलाई खेलमा पुनरागमन गर्दै सेमिफाइनल पुर्याउन जुड बेलिङ्घमले दुबै गोल गरे।
मियामीमा सम्पन्न रोमाञ्चक प्रतिस्पर्धामा निर्धारित ९० मिनेट १-१ गोलको बराबरीमा सकिएपछि खेल अतिरिक्त समयमा पुगेको थियो। जसमा बेलिङ्घमले निर्णायक गोल थप्दै इंग्ल्यान्डलाई अन्तिम चारमा पुर्याए।
खेलको ३६औँ मिनेटमा आन्द्रियास स्केल्डेरुपले मार्टिन ओडेगार्डको पासमा उत्कृष्ट गोल गर्दै नर्वेलाई अग्रता दिलाएका थिए। ह्यारी केनबाट बल खोसिएपछि ओडेगार्डले बायाँतर्फ स्केल्डेरुपलाई पास दिएका थिए। उनले डिफेन्डरलाई बिट गर्दै प्रहार गरेको बल पोस्टमा लाग्दै जाली चुमेको थियो।
पहिलो हाफको इन्जुरी समयमा इंग्ल्यान्ड खेलमा फर्कियो। एन्थोनी गोर्डनको पासमा बेलिङ्घमले बक्सभित्रबाट बायाँ खुट्टाले उत्कृष्ट फिनिस गर्दै खेल बराबरीमा ल्याए।
दोस्रो हाफमा नर्वेले पुनः अग्रता लिएको जस्तो देखिए पनि भीएआर परीक्षणपछि एर्लिङ हाल्यान्डले फाउल गरेको ठहर गर्दै गोल रद्द गरियो। त्यसपछि दुवै टोलीले केही राम्रो अवसर सिर्जना गरे पनि निर्धारित समयमा थप गोल हुन सकेन।
९३औँ मिनेटमा इंग्ल्यान्डले निर्णायक प्रहार गर्यो। मोर्गन रोजर्सको लामो दूरीको प्रहार नर्वेका गोलकिपर ओर्जान निलान्डले नियन्त्रण गर्न नसक्दा रिबाउन्ड बल बेलिङ्घमको अगाडि पुग्यो। उनले कुनै गल्ती नगरी सहज ट्याप-इन गर्दै गोल गरे।
बाँकी समयमा नर्वेले बराबरी गोलका लागि लगातार दबाब बनाए पनि इंग्ल्यान्डको डिफेन्सले अग्रता जोगायो। खेलको अन्त्यतिर हाल्यान्डलाई पनि परिवर्तन गरिएको थियो।
यससँगै इंग्ल्यान्ड लगातार कठिन नकआउट यात्रा पार गर्दै विश्वकपको सेमिफाइनलमा पुगेको छ। नर्वेको भने सन् १९९८ पछि पहिलो विश्वकप सहभागितामा गरेको ऐतिहासिक यात्रा क्वार्टरफाइनलमै टुंगिएको छ।
खेलमा बेलिङ्घम दुई गोल गर्दै नायक बने भने नर्वेका स्टार फर्वाड/स्ट्राइकर एर्लिङ हाल्यान्डलाई इंग्ल्यान्डले गोलविहीन राख्न सफल भयो।
आजै क्वाटरफाइनलको अन्तिम खेलमा अर्जेन्टिना र स्वीटजरल्याण्ड भिड्नेछन्।
