ढोरपाटन (बागलुङ)। सूचना प्रविधिको विकास र इन्टरनेटको प्रयोग बढ्दै गएसँगै साइबर अपराधसम्बन्धी घटना पनि बढेको छ। पछिल्लो चार वर्षमा गण्डकी प्रदेशमा मात्रै २ हजार ९ सय ५१ वटा उजुरी परेका छन्।
यस अवधिमा सबैभन्दा बढी कास्की र कम मनाङमा उजुरी परेका छन्। कास्कीमा १ हजार ६ सय ८३ र मनाङमा ३ जनाले उजुरी दिएका छन्। नेपाल प्रदेश प्रहरी कार्यालय गण्डकी प्रदेशका प्रहरी निरीक्षक प्रकाश पौडेलका अनुसार कास्कीमा आर्थिक वर्ष २०७८/७९ मा ११४ वटा उजुरी परेका थिए। आव २०७९/८० मा २३२, आव २०८०/८१ मा ९३८ र चालु आवको वैशाख मसान्तसम्म ३ सय ९९ वटा उजुरी परेका छन्।
नवलपुरमा आव २०७८/७९ मा ३१, आव २०७९/८० मा ४४, आव २०८०/८१ मा २०२ र चालु आर्थिक वर्षको वैशाख मसान्तसम्म ३९९ वटा मुद्दा परका छन्। तनहुँमा आर्थिक वर्ष २०७८/७९ मा १९, आव २०७९/८० मा ५२ वटा, आव २०८०/८१ मा १३७ र चालु आर्थिक वर्षको वैशाख मसान्तसम्म ४१ वटा मुद्दा परको प्रहरी निरीक्षक पौडेलले बताए।
स्याङ्जामा आर्थिक वर्ष २०७८/७९ मा २४, आव २०७९/८० मा ३३, २०८०/८१ मा ७३ र चालु आर्थिक वर्षको वैशाख मसान्तसम्म २९ वटा मुद्दा परेका छन्। बागलुङमा आर्थिक वर्ष २०७८/७९ मा ९, आव २०७९/८० मा ९, आव २०८०/८१ मा ३५ र चालु आर्थिक वर्षको वैशाख मसान्तसम्म २८ वटा उजुरी परेको छ।
गोरखामा आर्थिक वर्ष २०७८/७९ मा १९, २०७९/८० मा ११, आव २०८०/८१ मा ६४ र चालु आर्थिक वर्षको वैशाख मसान्तसम्म २४ वटा मुद्दा परेका छन्। लमजुङमामा आर्थिक वर्ष २०७८/७९ मा साइबर अपराधसम्बन्धी उजुरी परेको थिएन। आव २०७९/८० मा ४, आव २०८०/८१ मा ७१ र चालु आर्थिक वर्षको वैशाख मसान्तसम्म २६ वटा मुद्दा परेको छ।
पर्वतमा आर्थिक वर्ष २०७८/७९ मा १०, आव २०७९/८० मा १७, आव २०८०/८१ मा ५२ र चालु आर्थिक वर्षको वैशाख मसान्तसम्म ११ वटा परेका छन्। म्याग्दीमा आर्थिक वर्ष २०७८/७९ मा ६, आव २०७९/८० मा ६, आव २०८०/८१ मा ३६ र चालु आर्थिक वर्षको वैशाख मसान्तसम्म २४ वटा मुद्दा परेका छन्। मनाङमा आर्थिक वर्ष २०७८/७९ मा साइबर अपराधसम्बन्धी उजुरी परेका थिएनन्। आव २०७९/८० र ०८०/८१ मा एक/एक वटा परेका थिए भने चालु आर्थिक वर्षको वैशाख मसान्तसम्म एउटा उजुरी परेको तथ्यांक छ।
प्रदेश प्रहरी कार्यालयमा २०७८/७९ मा २, आव २०७९/८० मा ३, आव २०८०/८१ मा १३ वटा उजुरी परेका थिए। चालु आर्थिक वर्षको वैशाख मसान्तसम्म एउटा पनि उजुरी परेको छैन।
धेरै उजुरी फेसबुक प्रयोगकर्ताको
गण्डकी प्रदेशमा साइबर अपराधसम्बन्धी सबैभन्दा बढी उजुरी गर्ने फेसबुक प्रयोगकर्ता छन् भने कम उजुर गर्नेमा ह्वाट्सएप प्रयोगकर्ता छन्। चार वर्षमा २ हजार ५ सय ४६ जना फेसबुक प्रयोगकर्ताले उजुरी दिएका छन् भने ७३ जना ह्वाट्सएप प्रयोगकर्ताले उजुरी दिएको प्रहरी निरीक्षक पौडेलले जानकारी दिए।
१७७ जना टिकटक, ८१ जना इन्स्टाग्राम ७३ जना अन्य सामाजिक सञ्जाल प्रयोगकर्ताका उजुरी छन्। आर्थिक वर्ष २०७८/७९ मा १९० जना, आव २०७९/८० मा ३१३ जना, आव २०८०/८२ मा एक हजार ५४२ जना र चालु आर्थिक वर्षको वैशाख मसान्तसम्म ५०१ जना फेसबुक प्रयोगकर्ताले उजुरी दिएका छन्।
त्यस्तै आर्थिक वर्ष २०७८/७९ मा २५ जना, आव २०७९/८० मा ४९ जना, आव २०८०/८२ मा २९ जना र चालु आर्थिक वर्षको वैशाख मसान्तसम्म ७५ जना टिकटक प्रयोगकर्ताले उजुरी दिएका छन्। आर्थिक वर्ष २०७८/७९ मा ६ जना, आव २०७९/८० मा ३८ जना, आव २०८०/८१ मा २० जना र चालु आर्थिक वर्षको वैशाख मसान्तसम्म १७ जना इन्स्टाग्राम प्रयोगकर्ताले उजुरी दिएका छन्।
आर्थिक वर्ष २०७८/०७९ मा चार जना, २०७९/८० मा ९, आव २०८०/८२ मा २१ र चालु आर्थिक वर्षको वैशाख मसान्तसम्म १९ जना ह्वाट्सएप प्रयोगकर्ताले उजुरी दिएका छन्। चार वर्षमा ७३ जना अन्य सामाजिक सञ्जाल प्रयोगकर्ताले उजुरी दिएको प्रहरी निरीक्षक पौडेलले जानकारी दिए।
प्रहरीको तथ्यांकअनुसार सामाजिक सञ्जाल ह्याकसम्बन्धी बढी उजुरी परेको छ। ह्याकसम्बन्धी १ हजार ८०६ जना, फेक आइडीसम्बन्धी ६७४ जना, ठगीसम्बन्धी ३४, गालीगलौजसम्बन्धी ११३ जना, अश्लील गतिविधिसम्बन्धी २०५ जना र अन्य साइबर अपराधसम्बन्धी ६८ वटा उजुरी परेको छ।
प्रदेश प्रहरी कार्यालयका अनुसार चालु आर्थिक वर्षमा परेका ६६६ उजुरीमध्ये ४३० वटा फर्छ्यौट भएका छन्। २३६ उजुरी भने फर्छ्यौटका क्रममा छन्।
सबैभन्दा बढी युवा पीडित
प्रदेश प्रहरी कार्यालय गण्डकीको तथ्यांक हेर्दा साइबर अपराधबाट सबैभन्दा बढी युवापुस्ता पीडित भएको देखिन्छ। विद्यालय र क्याम्पस पढ्ने उमेर समूहका विद्यार्थी र आफैं केही गर्नसक्ने युवा साइबर अपराधबाट पीडित बनेको पाइएको छ।
आर्थिक वर्ष २०७८/७९ देखि हालसम्म २६–३५ उमेर समूहका एक हजार ६१ जना पीडित भएका छन्। १६ वर्ष मुनिका ५८ जना, १६–२५ उमेर समूहका ८३६ जना पीडित भएका छन्। त्यस्तै, ३६–४५ उमेर समूहका ६२७ जना, ४६–६० उमेर समूहका २६९ जना, ६० वर्ष माथिका ५४ जना र अन्य उमेर समूहका ४६ जना पीडित बनेका छन्।
किन युवा पुस्ता बढी पीडित ?
साइबर अपराधसम्बन्धी कानुनबारे सचेत नहुँदा घटनाहरु हुने गरेको देखिएको अधिवक्ता राम शर्माको भनाइ छ। साइबर अपराध कम गर्नका लागि सामाजिक सञ्जाल प्रयोगकर्ता सचेत हुन जरुरी रहेको उनले बताए।
साइबर कानुनको कार्यान्वयन अलि प्रभावकारी हुन नसक्दा घटना हुने गरेको उनी बताउँछन्। अधिवक्ता शर्माले भने, ‘अहिले मर्यदाविपरीत तस्बिर र भिडियो पोस्ट गर्ने प्रचलन जस्तो भयो, यसले स्वयं व्यक्ति र समाजलाई पनि राम्रो गरेको छैन। हरेक नागरिक सचेत नभएसम्म यस्ता किसिमका अपराधका घटना कम गर्न गाह्रो हुन्छ।’
चिनजानका आधारमा मोबाइल बैंकिङका पासवर्ड अरुलाई दिने र अपरिचित लिंक खोल्दा धेरैको फेसबुक ह्याक हुने गरेको धेरै मानिसहरु पीडित हुनुपरेको शर्मा बताउँछन्। मुलुकी ऐन तथा अन्य ऐनका विभिन्न दफा लगाएर कानुन कारबाही हुँदै आएकामा विसं २०६३ बाट भने विद्युतीय कारोबार नियन्त्रणसम्बन्धी विशेष ऐन नै ल्याई हाल लागू भइरहेको जानकारी उनले दिए।
उक्त ऐनको दफा ४४ देखि दफा ५८ सम्म विभिन्न प्रकारका कसुरको उल्लेख गरी सो प्रमाणित भएमा कानुनअनुसार ५० हजारदेखि पाँच लाख रुपैयाँसम्म जरिवाना तथा ६ महिनादेखि पाँच वर्षसम्मका जेल सजाय कसुर अपराधको मात्रा हेरी अदालतले तोक्नसक्ने कानुनी प्रावधान छ। रासस
