काठमाडौं। ‘द क्लिफ’ले पर्यटकका लागि भ्यालेन्टाइन्स डेको अवसरमा ट्यान्डम ‘दुईजनासँगै खेल्न मिल्ने’ बन्जी र विश्वकै लामो तथा अग्लो मेगाट्रोल सञ्चालनमा ल्याएको छ।
कम्पनीले फेब्रुअरी महिनाभर पर्यटक लक्षित आकर्कषक छुटको योजना ल्याएको जनाएको छ।
कम्पनीले ट्याण्डम स्वीङ, स्काई साइकल, स्काइ क्याफे र रिसोर्ट तर्फ कटेज रुममा २० प्रतिशत छुट दिने जनाएको छ।
स्वीङ गर्दा जोडीलेसँगै खेल्ने सुविधा पहिले नै भए पनि बन्जीमा भने नयाँ सुरुवात गरिएको द क्लिफका अध्यक्ष राजु कार्कीले बताए।
‘अब पर्यटकहरुले आफूले चाहेको व्यक्तिसँग अंगालो मारेर बन्जी गर्न सक्नुहुन्छ’, कार्कीले भने,’ यसले डर कम गराइ आत्मविश्वास बढाउने र थप आत्मीय अनुभव गराउने छ।’
उनका अनुसार ट्यान्डम बन्जी खेल्न १३ हजार ५ सय रुपैयाँ शुल्क तोकिएको छ। जस अन्तर्गत फोटो भिडियो र २ वटा बन्जी टिसर्टको थप २ हजार रुपैयाँ हतिरिक्त तिर्नुपर्ने हुन्छ।
दुई सय ५५ मिटर अग्लो मेगा ट्रोलको लम्बाइ १२ सय २८ मिटर छ। यसमा एकैपटकमा तीन जनासम्म खेल्न सकिन्छ। एक्लै वा जोडीसँगै पनि खेल्न सकिने र मेगाट्रोलको गति प्रतिघण्टा १ सय ४० किलोमिटरको हुनेछ।
मेगाट्रोल खेल्न प्रति व्यक्ति ४ हजार रुपैयाँ शुल्क निर्धारण गरिएको छ। ट्याण्डम (जोडी) खेल्दा ७ हजार रुपैयाँ र तीन जना खेल्दा ९ हजार ५ सय रुपैयाँ शुल्क तोकिएको छ। टिसर्ट र भिडियो प्याकेजको थप शुल्क लाग्नेछ।
‘मेगाट्रोल पनि साहसिक गतिविधिमै पर्छ, यसले जीपलाइन र रोलरकोस्टरको ब्लेन्डेड अनुभव दिन्छ,’ कार्कीले भने, ‘एक वर्ष अघि निर्माण सुरु गरिएको मेगाट्रोल भ्यालेन्टाइन्स डेको मौका पारेर सुरु गरेका हौँ।’
पोखरास्थित ‘द क्लिफ’को काउन्टरबाट बुकिङ गर्नेले हजार रुपैयाँमा पोखरादेखि कुश्मासम्मको दुईतर्फी यातायात सुविधासमेत पाउन सक्ने जनाइएको छ ।
