काठमाडौं। गायक प्रकाश सपूतको परिचय संगीतकार, गीतकार, अभिनेता र निर्देशकका रूपमा स्थापित छ। गीत र श्रव्यदृश्यमार्फत आफ्नो कथालाई व्यक्त गरिरहेका गायक सपूतले चलचित्र निर्माण गर्नुभएको छ।
चलचित्रमा पनि माथि उल्लिखित भूमिकामै उनलाई पाउन सकिन्छ। एकै जनाले यति धेरै भूमिका निर्वाह गर्न गाह्रो हुँदैन? सपूतले आउँदा दिनमा एक विधामा मात्र केन्द्रित हुने प्रतिक्रिया दिए। आफ्नो निर्देशनको पहिलो फिल्म ‘वसन्त’को ‘साँझ पर्यो झमक्कै’ बोलको गीत र श्रव्यदृश्य सार्वजनिक गर्न शनिबार साँझ दरबारमार्गस्थित एक फिल्म हलमा आयोजना गरिएको पत्रकार सम्मेलनमा गायक सपूतले आफ्नो समूहका कारण यसपटक सफल भए पनि आउँदा दिनमा एक विधाबाहेक अरुको जिम्मेवारी नलिने बताए।
उनले भने, ‘आफैंले सबै काम गर्दा गाह्रो नै हुनेरहेछ। विशेषतः निर्देशन र अभिनय एकैपटक गर्दा दुवैमा ऊर्जा बाँडिएको महसुस भयो। त्यसैले आउँदो चलचित्रमा म निर्देशक भएमा आफ्नो दृश्यलाई निकै कम राख्छु, नत्र सुनिल विकलाई निर्देशनको जिम्मेवारी दिन्छु र म अभिनयमा मात्र केन्द्रित हुन्छु। किनकि मेरै पछिल्ला कामभन्दा कमजोर नहोस् भन्ने मेरो प्रयास रहन्छ।’
यस विषयमा अभिनय र निर्देशनसँगै गरिरहेका निश्चल बस्नेत, अर्पण थापालगायतसँग छलफल गरेको गायक सपूतले बताए। गायनमै व्यस्त हुँदा चलचित्र निर्देशनमा आउनु कथालाई धेरै दर्शकसम्म पुर्याउने चाहना भएको उनले सुनाए।
‘भोगाइ, देखाइसहितका आफ्ना कथा गीतमार्फत व्यक्त गरिरहेको थिएँ। मलाइ ती कथा गीतमै सकाउँछु कि भन्ने लाग्यो। त्यही भएर चलचित्र बनाउने योजनालाई मूर्तरुप दिएको हुँ। यो मजस्ता धेरै मध्यमवर्गीय युवाको कथा हो,’ उनले भने।
यो चलचित्रको कथामा आफ्नो बालापन र भोगाइ भए पनि आफ्नै जीवनी भने नरहेको गायक सपूतले स्पष्ट पारे। अभिनेत्री स्वस्तिमा खड्काले गायक सपूतले एउटा परिपक्व चलचित्रकर्मी भएर काम गरेको बताइन। ‘गायक सपूतलाई मैले नयाँजस्तो कहीँकतै पाइनँ । उहाँको काममा परिपक्वता थियो, जसलाई दर्शकले छिट्टै पर्दामा महसुस गर्नुहुनेछ,’ उनले भनिन्, ‘यो चलचित्रमा जोडिएर शान्ति नामक पात्र बाँच्न पाउँदा आफूलाई भाग्यमानी ठानेकी छु। यो मलाई वर्षौँसम्म सम्झिने पात्र बन्ने छ।’
सार्वजनिक गरिएको ‘साँझ पर्यो झमक्कै’ गीतमा शब्द, संगीत र स्वर सपूतकै छ भने गायनमा शान्तिश्री परियारले साथ दिएकी छन्। फिल्ममा प्रभात पाल ठकुरी, अनुप बराल, कमलमणि नेपाल, प्रकाश घिमिरे लगायतको पनि अभिनय छ।
आर्थिक रूपमा विपन्न विश्वकर्मा समुदायका छोराको लेखक बन्ने सपना र लक्ष्य हासिल गर्न उसले गर्ने संघर्षलाई चलचित्रको विषय बनाइएको निर्माण पक्षले जनाएको छ। यो चलचित्र आगामी चैत २२ गतेदेखि प्रदर्शनमा आउने बताइएको छ। रासस
