काठमाडौं। फाइनान्स कम्पनीको वित्तीय विवरण सेयर लगानीकर्तालाई झस्काउने खालको आएको छ। एक महिनायता फाइनान्स कम्पनीको सेयर मूल्य अस्वाभाविक रुपमा बढेकामा वित्तीय विवरण भने त्यसविपरीतको आएको छ।

सूचीकृत १५ मध्ये १३ वटा फाइनान्स कम्पनीले वित्तीय विवरण सार्वजनिक गरेकामा ८ वटाको वितरणयोग्य नाफा ऋणात्मक देखिएको छ। कम्पनीहरुले आर्थिक वर्ष २०८०/८१ मा कुल ५८ करोड ३६ लाख रुपैयाँ खुद नाफा आर्जन गरेपनि ८ वटाले लाभांश वितरण गर्न नपाउने विवरण सार्वजनिक भएको हो।

१३ वटा फाइनान्स कम्पनीले आर्थिक वर्ष २०७९/८० मा ७ करोड रुपैयाँ खुद नाफा कमाएका थिए।

गत वर्ष ३ वटा फाइनान्स घाटामा गएका छन्। पोखरा फाइनान्स १० करोड ६४ लाख, सेन्ट्रल फाइनान्स ६ करोड ३८ लाख र प्रोग्रेसिभ फाइनान्स ३ करोड ८० लाख रुपैयाँले घाटामा गएका हुन्। अघिल्लो वर्ष ४ वटा फाइनान्स घाटामा गएका थिए।

सेयर मूल्य अनुसार प्रति सेयर आम्दानी र नेटवर्थ पनि निकै कमजोर देखिएको छ। लगानीकर्ताहरुले प्रति कित्ता २ हजार रुपैयाँसम्म लगानी गरेको नेपाल फाइनान्सको प्रति सेयर आम्दानी २.४८ रुपैयाँ मात्र देखिएको छ।

वित्तीय विवरण निकै कमजोर खालको सार्वजनिक भएपछि यो फाइनान्सको सेयर मूल्यमा सोमबार नेगेटिभ सर्किट लागेको छ।

आव २०८०/८१ मा गोर्खाज, गुडविल, मल्टिप्रपोज, रिलायन्स र मञ्जुश्री फाइनान्सले खुद नाफा बढाएका छन्। तर गोर्खाज, गुडविल र रिलायन्सले लाभांश बाँड्न पाउने छैनन्। उनीहरुको वितरणयोग्य नाफा नै ऋणात्मक छ।

गत आर्थिक वर्ष फाइनान्स कम्पनीले आर्जन गरेको खुद नाफा

फाइनान्स कम्पनीको खराब कर्जा औसतमा ०.३२ प्रतिशतले बढेर ६.३३ प्रतिशत पुगेको छ। कम्पनीहरुले अघिल्लो वर्षभन्दा खराब कर्जा घटाए पनि ७ कम्पनीको ५ प्रतिशतभन्दा बढी छ।

गोर्खाज फाइनान्सको सर्वाधिक १२.४९ प्रतिशत खराब कर्जा छ। कम्पनीको खराब कर्जा अघिल्लो वर्ष औसतमा १९.२५ प्रतिशत थियो। मञ्जुश्री फाइनान्सको खराब कर्जा सबैभन्दा न्यून २.९७ प्रतिशत छ।

वितरणयोग्य नाफा ऋणात्मक हुने कम्पनीको सूचीमा नेपाल, बेस्ट, पोखरा, सेन्ट्रल र प्रोग्रेसिभ फाइनान्स पनि छन्। वितरणयोग्य नाफा ऋणात्मक भएका कम्पनीले सेयरधनीलाई लाभांश बाँड्न सक्दैनन्।

सेयर मूल्य अस्वाभाविक रुपमा बढाइएका फाइनान्स कम्पनीमध्ये चार वटाको मात्र प्रति सेयर आम्दानी दोहोरो अंकमा छ।

तीन कम्पनीको प्रति सेयर आम्दानी ऋणात्मक छ। प्रति सेयर नेटवर्थ लगायत अन्य वित्तीय सूचक पनि नाजुक छन्। वितरणयोग्य नाफा ऋणात्मक र प्रति सेयर आम्दानी २.५८ रुपैयाँ मात्र भएको विवरण सार्वजनिक हुँदा पनि रिद्यायन्स फाइनान्सको सेयर मूल्य सोमबार ४.२१ प्रतिशतले बढाएर प्रति कित्ता ५९४ रुपैयाँ पुर्‍याइएको छ।

अर्थतन्त्रमा देखिएको संकुचनका कारण पोहोर बैंक तथा वित्तीय संस्थाले व्यवसाय विस्तार गर्न सकेनन्। नयाँ व्यापार विस्तारमा लागेको ब्रेक र लगानी गरेको रकम रिकभर हुन नसक्दा बैंक तथा वित्तीय संस्थाकै ब्यालेन्ससिटमा असर देखिएको छ।

व्यवसाय विस्तारमा आएको संकुचनका कारण पोहोर आधा वाणिज्य बैंककै नाफामा गिरावट आएको छ।

फाइनान्स कम्पनीको खराब कर्जा