नुवाकोट। नुवाकोटको ककनी गाउँपालिका-४ का सूर्यबहादुर तामाङलाई अपहरण गरेर ७ लाख रुपैयाँ फिरौती लिन आएका २ जनालाई प्रहरीले पक्राउ गरेको छ।

जिल्ला प्रहरी कार्यालयका अनुसार पक्राउ पर्नेमा जिल्लाको ककनी गाउँपालिका-४ का राजकुमार तामाङ र शिवपुरी गाउँपालिका-८ का चन्द्रबहादुर तामाङ रहेका छन्।

जिल्ला प्रहरी कार्यालयका प्रवक्ता तथा प्रहरी नायब उपरीक्षक खगेन्द्रबहादुर खड्काका अनुसार गत सोमबार राति बिरामी लिन आफ्नो घर काहुलेबाट ककनी जाने क्रममा सूर्यबहादुरलाई उनीहरुले अपहरण गरेका थिए। सो घटनामा संलग्न अन्य फरार भएकाले उनीहरुको खोजी भइरहेको उनले बताए।

‘सूर्यबहादुरलाई अपहरण गरेर जिल्लाको पञ्चकन्या गाउँपालिका-५ मा पुर्‍याएर आफन्तसँग फिरौती माग्ने क्रममा ७ लाख रुपैयाँ दिन सहमति भएपछि पीडित परिवारबाट त्यसको सूचना प्राप्त गरेका हौँ,’ उनले भने, ‘फिरौती बुझ्न आउने क्रममा ककनीका राजकुमार र शिवपुरीका चन्द्रबहादुरलाई नियन्त्रणमा लिएका छौँ।’

उनीहरुलाई प्रहरीले अपहरण तथा शरीर बन्धक मुद्दामा हिरासतमा राखी अनुसन्धान गर्न जिल्ला अदालतबाट ७ दिनको म्याद लिएको जनाइएको छ।

घटनामा संलग्न हुनेहरूको सङ्ख्या धेरै भएकाले अन्यको खोजी भइरहेको जिल्ला प्रहरी कार्यालयका प्रमुख प्रहरी उपरीक्षक सञ्जयसिंह थापाले जानकारी दिए। रासस