काठमाडौं। चार जिल्लालाई जोड्ने केवलकार परियोजना अगाडि बढ्ने भएको छ। सेराबेंशी (पर्वत)-मुक्तिनाथ केवलकार आयोजना अगाडि बढ्ने भएको हो।
कम्पनीले परियोजना विकासका लागि वातावरणीय प्रभाव मूल्यांकनको काम सुरु गरेको छ। कास्कीको अन्नपूर्ण गाउँपालिका, म्याग्दीको अन्नपूर्ण गाउँपालिका, पर्वतको मोदी गाउँपालिका र मुस्ताङको घरापझोंग, थासाङ र बह्रागउँ मुक्तिक्षेत्र गाउँपालिकामा मुक्तिनाथ दर्शन प्रालिले केवलकार परियोजना सञ्चालन गर्न लागेको छ।
कम्पनीले ६ दिनसम्म स्थानीयसँग अन्तर्कृया गर्न खोजेको छ। जेट ११ देखि जेड १७ गतेसम्म प्रभावित गाउँपालिकाका बासिन्दासँग छलफल हुने छ।
कालीगण्डकी नदी र मोदी नदीको जलाधार क्षेत्र हुँदै जाने आयोजना पर्वतको शेराफाँटबाट सुरु हुने छ। मुक्तिनाथ मन्दिरनेरको रानीपौवासम्म केवलकार सञ्चालन हुने छ। आयोजना विश्वकै सबैभन्दा लामो परियोजनाका रुपमा कल्पना र डिजाइन गरिएको छ। आयोजनाले १७७.३८२ हेक्टर वन क्षेत्र प्रयोग गर्छ।
