काठमाडौं। फोन पेको प्रमुख टेक्नोलोजी अफिसरमा सुवास थापा नियुक्त भएका छन्। थापालाई मंगलबार फोन पेको संचालक समितिले नियुक्त गर्ने निर्णय गरेको हो।
वित्तीय प्रविधि (फिनटेक) उद्योगको क्षेत्रमा ९ वर्षभन्दा बढी अनुभव सम्हालिसकेका थापा नेपाल क्लियरिङ हाउस लिमिटेडमा ‘हेड–प्रोडक्ट र सिस्टम डेभलपमेन्ट’ को रूपमा कार्यरत थिए।
राष्ट्रिय भुक्तानी स्वीच परियोजनाको कार्यान्वयनमा उनको प्रमुख भूमिका थियो। इन्जिनियरिङ, प्रविधि डिजाइन, समाधान विकास, सरोकारवाला सचेतना र म्यानुअल भुक्तानी प्रक्रियाको डिजिटलाइजेसनको कार्यान्वयनमा थापा सक्रिय रहेको फोन पेले जनाएको छ।
कम्प्युटर एप्लिकेसनमा मास्टर्स गरेका थापाले क्याम्ब्रिज विश्वविद्यालयअन्तर्गत वैकल्पिक वित्तको लागि क्याम्ब्रिज केन्द्रबाट ‘क्याम्ब्रिज फिनटेक र रेगुलेटरी इनोभेसन’ कार्यक्रम पूरा गरेका छन्।
फोनपे नेटवर्कमा ६० वटा बैंक तथा वित्तीय संस्था र भुक्तानी सेवा सेवा प्रदायक आबद्ध छन्। फोन पेमा हालसम्म ६ लाख ७० हजारभन्दा बढी मर्चेन्ट छन्। एक करोड ४० लाखभन्दा धेरै मोबाइल बैकिङ प्रयोगकर्ता तथा भुक्तानी सेवा प्रदायकका मोबाइल एप मार्फत फोनपेले सेवा पुर्याउँदै आएको छ।
