काठमाडौं। एनआरएन इन्फ्रास्ट्रक्चर एण्ड डेभलपमेन्ट लिमिटेडले साउन १६ गतेदेखि  आइपिओ निष्कासन गरेको छ । कम्पनीले प्रतिसेयर एक सय रुपैयाँमा ३३ लाख ९८ हजार ४६ कित्ता आइपिओ निष्कासन गरेको हो । 

कम्पनीले निष्कासन गरेको कित्तामध्ये ५ प्रतिशत अर्थात १ लाख ६९ हजार ९०२ कित्ता साधारण सेयर सामूहिक लगानी कोषका लागि बाँडफाँट गरिएको छ। २ प्रतिशत अर्थात ६७ हजार ९६१ किता सेयर कर्मचारीहरुका लागि सुरक्षित गरिएको गरी बाँकी रहेको ३१ लाख ६० हजार १८३ कित्ता सर्वसाधारणलाई बिक्री गर्न लागेको हो ।  

कम्पनीले हाल कायम जारी पुँजी एक अर्ब १३ करोड २६ लाख रुपैयाँको ३० प्रतिशत अर्थात बराबरको आईपीओ निष्कासन गर्न लागेको हो । कम्पनीको चुक्ता पुँजी ७९ करोड २८ लाख ७७ हजार छ । बिक्री गर्न लागेको आइपिओ वितरणपछि सो पुँजी एक अर्ब १३ करोड २६ लाख भन्दा बढी पुग्नेछ । 

आवेदकहरुले न्यूनतम १० कित्तादेखि अधिकतम ३१ लाख ६० हजार १८० कित्तासम्म आवेदन दिन सकिनेछ। निष्कासन बन्द छिटोमा साउन २१ गते हुनेछ भने ढिलोमा भदौ ३ गते हुनेछ।

कम्पनीको धितोपत्र निष्कासन तथा बिक्री प्रबन्धक सानिमा क्यापिटल लिमिटेड छ। आवेदकहरुले नेपाल धितोपत्र बोर्डबाट स्वीकृति प्राप्त गरेको सम्पूर्ण आस्वा सदस्य बैंक तथा वित्तीय संस्थाहरु र तिनका शाखा कार्यालयबाट आवेदन दिन सक्नेछन्। कम्पनीले निष्कासन गर्न लागेको आईपीओलाई क्रेडिट रेटिङ एजेन्सी केयर रेटिङ्स नेपालले केयर एनपी आईपीओ ग्रेड ४ रेटिङ प्रदान गरेको छ। यसले कम्पनीको आधारभूत अवस्था औसतभन्दा कमजोर रहेको संकेत गर्दछ।

आर्थिक वर्ष २०७५/७६ सम्ममा कम्पनीको प्रतिसेयर नेटवर्थ १०२ रुपैयाँ ६ पैसा थियो भने प्रतिसेयर आम्दानी २ रुपैयाँ ४ पैसा छ। कम्पनीले आर्थिक वर्ष २०७६/७७ को अन्त्यसम्ममा २ करोड ४१ लाख ७० हजार रुपैयाँ सञ्चित नाफा कमाउने प्रक्षेपण गरेको छ। यस अनुसार कम्पनीको प्रतिसेयर नेटवर्थ १०२ रुपैयाँ १३ पैसा र प्रतिसेयर आम्दानी २ रुपैयाँ ४ पैसा कायम हुने प्रक्षेपण गरेको छ। कम्पनीको आइपिओ बिक्रीपछि नेप्सेले नेटवर्थको तीन गुणासम्म मूल्य रेञ्ज तोक्ने गरेको छ ।