काठमाडौं । बैंकको खराब वित्तीय अवस्थालाई सुधार गर्न नसकेपछि दवाव झेलिरहेका माछापुच्छ्रे बैंकका प्रमुख कार्यकारी अधिकृत भाइकाजी श्रेष्ठले राजिनामा दिएका छन् । अघिल्लो साता दिएको उनको राजिनामा सञ्चालक समितिले स्वीकृत गरिसकेको छ । भाइकाजीको राजिनामा स्वीकृत भएपछि सञ्चालक समितिले विजयबहादुर श्रेष्ठलाई अहिले कामु प्रमुख कार्यकारी अधिकृतको जिम्मेवारी दिएको छ ।
सञ्चालक समिति निकट स्रोतका अनुसार माछापुच्छ्रे बैंकको नयाँ सिइओका लागि बोर्ड अहिले बैंक अफ एशियाबाट राजिनामा दिएका परशुराम कुँवर क्षेत्री,  नेपाल एसबीआइका चिफ क्रेडिट अफिसर तुल्सीराम गौतम र लुम्बिनी बैंकका प्रमुख कार्यकारी अधिकृत सोभनदेव पन्तसँग छलफलमा छ। कुँवर र पन्तले माछापुच्छ्रे नजाने बताएपछि अहिले गौतम जाने पक्का पक्की भएको छ ।  दश वर्ष अघि नेपाल एसबीआइ पुगेका गौतम त्यस अघि नेपाल इन्भेष्टमेन्ट बैंकमा कार्यरत थिए ।
गौतमलाइ कार्यकारी बनाउने निर्णयपछि माछापुच्छ्रेका विजयबहादुर श्रेष्ठ रूष्ट बनेका छन्, उनले राष्ट्र बैंकमा समेत यस विषयमा गुनासो गरेका थिए । कुँवरसँग राधेश पन्तले राजिनामा दिएपछि खाली भएको कुमारी बैंकमा सिइओ बनाउने विषयमा समेत त्यहाँको बोर्डले पनि छलफल गरिरहेको छ । कुमारीमा अहिले उदय कुमार उपाध्यायलाई कामु प्रमुख कार्यकारी अधिकृतको जिम्मेवारी दिइएको छ । दुई महिना अघि माछापुच्छ्रे बैंक स्टेण्डर्ड फाइनान्ससँग गाभिएपछि बैंकको वित्तीय अवस्था सुधार गर्न भाइकाजीमाथि तिव्र दवाव थियो । उनी प्रमुख कार्यकारी अधिकृत भएकै बेला एभ्को समूहलाई दिएको ऋण खराब कर्जामा परिणत भएपछि माछापुच्छ्रे बैंकको वित्तीय अवस्था राम्रो हुन सकेको थिएन । बैंकले एभ्को समूहलाई दिएको झण्डै एक अर्ब रुपैयाँ खराब कर्जामा परिणत भएको थियो । बैंकको खराब कर्जा साढे चार प्रतिशत छ ।
स्टेण्डर्डसँग मर्ज भएपछि पनि गत आर्थिक वर्षको अन्तमा माछापुच्छ्रे बैंकको मुनाफा जम्मा ७३ लाख रुपैयाँ मात्रै थियो । अघिल्लो वर्ष बैंकले ९४ लाख रुपैयाँ मुनाफा आर्जन गरेको थियो ।
मर्जरपछि माछापुच्छ्रे बैंकको चुक्ता पुँजी २ अर्ब ४७ करोड रुपैयाँ पुगेको छ । मर्जरपछि बैंकमा अध्यक्ष र प्रमुख कार्यकारी अधिकृत माछापुच्छ्रे बैंकबाट थिए भने स्टेन्डर्डका प्रमुख कार्यकारी अधिकृतलाई नायव महाप्रबन्धकको जिम्मेबारी दिइएको छ ।
माछापुच्छ्रेका अध्यक्ष सुर्यवहादुर केसी हुन् । बैंकमा अहिले नौ जनाको सञ्चालक समिति छ । स्टेन्डर्ड फाइनान्सबाट गैरआवासिय नेपाली संघका संस्थापक अध्यक्ष उपेन्द्र महतो माछापुच्छ्रेमा छिरेका हुन् । महतोका तर्फबाट उनका भाइ विरेन्द्र महतो बैंकमा सञ्चालक छन् । स्टेन्डर्ड फाइनान्स माछापुच्छ्रेसँग एक सय रुपैयाँको सेयर ८५ रुपैयाँ मूल्यांकन गरी मर्ज भएको हो ।

काठमाडौं । ग्लोबल बैंक, लर्ड बुद्ध र आईएमई फाइनान्स मर्जको फाईदा तत्कालै अरुले कसैले नपाए पनि ग्लोबल बैंकका लगानीकर्ताहरुलाई भने एकै दिन पाएका छन् । मर्जर पछि पहिलो कारोबार भएको दिन आईतबार कायम भएको अन्तिम मूल्य अनुसार ग्लोबल बैंकका लगानिकर्ताको कुल लगानी १४.८४ प्रतिसतले बढेको छ ।
मर्ज भएको कम्पनीको सेयर मूल्य पुरानो ग्लोबलको भन्दा उच्च कायम हुनुका साथै ग्लोबलका लगानीकर्ताले ग्लोबल आईएमई बैंकमा साविकको भन्दा धेरै सेयर प्राप्त गरेका कारण उनीहरु मालामाल भएका हुन् । सम्झौता अनुसार ग्लोबलमा १०० कित्ता भएकाले १०५ कित्ता सेयर पाएका छन् भने मर्जर अघिको अन्तिम मूल्य प्रति सेयर १ सय ६० बाट बढेर ग्लोबल आईएमईको प्रति कित्ता सेयरको मूल्य १ सय ७५ कायम भएको छ ।

एक सय कित्ता सेयर हुने हरू मर्ज हुनुअघि र पछिको नाफा घाटा यस्तो छ ।

ग्लोबलको फाईदाको मूल्य आईएमई र लर्ड बुद्धका लगानीकर्ताले चुकाउनु परेको छ । दुई कम्पनीमध्ये पनि आईएमईकाले उच्च मूल्य चुकाएका छन् । मर्जर अघि र पछिको अवस्था तुलना गर्दा आईएमईका लगानीकर्ताको कुल सम्पत्ती झण्डै १३ प्रतिसतले घटेको छ । मर्जर पछिको ग्लोबल आईएमईमा आईएमईका लगानीकर्ताको सेयर संख्या पहिले जत्तिकै भएपनि सेयर मूल्य मर्जर अघिको प्रति सेयर २ सय १ बाट घटेर १ सय ७५ मा आएका कारण ठुलो नोक्सानी भएको हो ।
अर्कोतर्फ लर्ड बुद्धका लगानीकर्ताको सम्पत्ती भने मर्जर पछि ४.३ प्रतिसतले घटेको छ । ग्लोबल आईएमई बैंकमा साविकको भन्दा कम अनुपातमा सेयर पाएका भएपनि सेयर मूल्यमा उच्च परिवर्तन भएका कारण लर्ड बुद्धका लगानीकर्ताको सम्पत्ती न्यून दरमा घटेको हो । मर्जरको सहमति अनुसार लर्ड बुद्धमा १०० कित्ता सेयर भएकाले ग्लोबल आईएमईमा ७० कित्ता सेयर प्राप्त गरेका थिए । मर्जर अघिको प्रति सेयर मूल्य १२८ मा उच्च बृद्धि भएर मर्जर पछि प्रति सेयर १७५ कायम भएका कारण लर्ड बुद्धका लगानीकर्ताको कुल सम्पत्तीमा ठुलो गिरावट नआएको हो ।
मर्जर प्रक्रिया सरु भए लगत्तै नेप्सेले तीनै कम्पनीको सेयर कारोबार रोक्का गरेको थियो । मर्ज भएपछि ग्लोबल आइएमइको चुक्ता पुँजी २ अर्ब १८ करोड रुपैयाँ पुगेको छ । ग्लोबल बैंकको चुक्ता पुँजी १ अर्ब ६० करोड रुपैयाँ थियो, आइएमइको ३६ करोड र लर्ड वुद्धको १८ करोड रुपैयाँ थियो । मर्ज हुनु अघि ग्लोबल बैंकको नेपाल स्टकमा भएको अन्तिम कारोवार १६० रुपैयाँ, आइएमईको २०१ रुपैयाँ र लर्ड बुद्धको १२८ रुपैयाँमा कारोवार भएको थियो । यो आधारमा ग्लोबल बैंकको बजार पुँजीकरण दुई अर्ब ५६ करोड ३२ लाख, आइएमईको ८६ करोड ८० लाख र लर्ड बुद्धको १९ करोड २० लाख रुपैयाँ थियो ।
मर्ज हुनु अघि यी तीन संस्थाको कुल बजार पुँजीकरण तीन अर्ब ६२ करोड ३२ लाख रुपैयाँ थियो । आईतबारको अन्तिम मूल्य अनुसार ग्लोबल आईएमईको कुल बजार पूँजीकरण २ अर्ब ८० करोड २५ लाख रुपैंया छ । नेप्सेमा स्थगित कारोवार सुचारु गर्नु अघि ग्लोबल आइएमई बैंकले सेयरधनीलाई १० प्रतिशत नगद र तीन प्रतिशत बोनस सेयर दिने घोषणा गरिसकेको छ ।