काठमाडौं। भैरहवा-काठमाडौं  उडानका क्रममा टायर पड्किएर धावन मार्गमै राखिएको बुद्ध एयरको जहाज पार्किङ वेमा ल्याइएको छ। 

प्राविधिक टोलीले  जहाजको पाङ्ग्रा फेरेर पार्किङमा ल्याएलगत्तै रात्रि उडान सामान्य अवस्थामा रहेको विमानस्थल प्रमुख गोविन्दप्रसाद दाहालले बताए। 

'जहाजको टायर फेरेर पार्किङमा ल्याइसकिएको छ। कम्पनी  र हवाई सुरक्षा विभागका प्राविधिक टोलीले जहाज निरीक्षण गरेपछि मात्र उडान गर्न दिइनेछ,' प्रमुख दाहालले भने। 

उनका अनुसार आज यो गन्तव्यमा हुनुपर्ने विभिन्न वायुसेवाका कुल ३८ वटा उडान अवतरणमध्ये सो समाचार तयार पार्दासम्ममा ३० वटा सम्पन्न भइसकेका छन्। बाँकी आठवटा पनि सुरु भइसकेको उनले जानकारी दिए।  

शनिबार दिउँसो बुद्धको भैरहवा-काठमाडौं उडान गर्ने क्रममा ९एन-एजेएस कलसाइनको एटिआर जहाजको पांग्रा पड्किएपछि केही अवधि उडान प्रभावित भएको थियो।