काठमाडौं। पोखरा एभेन्जर्सले कर्णालीविरुद्ध सिजनकै सबैभन्दा ठूलो लक्ष्य प्रस्तुत गरेको छ। नेपाल प्रिमियर लिग (एनपीएल) अन्तर्गत आज जारी खेलमा टस जितेर ब्याटिङमा उत्रिएको पोखराले निर्धारित २० ओभरमा ३ विकेट गुमाउँदै २१७ रन बनाएको हो।

पोखरालाई सिजनकै उच्च स्कोरमा पुर्‍याउन ओपनर युवराज साम्राले शतकीय इनिङ्स खेले। उनले ४८ बलमा १० चौका र ६ छक्का प्रहार गर्दै १०२ रन बनाए। त्यस्तै, कुशल भुर्तेलले पनि अर्धशतकीय इनिङ्स खेले। भुर्तेलले ३९ बलमा ७ छक्काको सहायतामा ६२ रन बनाए।

यो स्कोर एनपीएल इतिहासको दोस्रो ठूलो स्कोर हो। सबैभन्दा ठूलो स्कोर विराटनगर किंग्सले दोस्रो संस्करणमा पोखरा विरुद्ध नै बनाएको थियो। त्यसबेला विराटनगरले ६ विकेट गुमाएर २२० रन बनाएको थियो।

बलिङमा सोमपाल कामीले २ तथा मार्क वाटले १ विकेट लिए।

कर्णाली केहीबेरमा जवाफी ब्याटिङमा उत्रिँदैछ।