काठमाडौं। पोखरा एभेन्जर्स लगातार चौथो खेलमा पनि पराजित भएको छ। नेपाल प्रिमियर लिग (एनपीएल) अन्तर्गत आजको दोस्रो खेलमा चितवनले पोखरालाई ३० रनले हराएको हो।
कीर्तिपुरस्थित टीयू क्रिकेट मैदानमा टस हारेर ब्याटिङमा उत्रिएको चितवनले निर्धारित निर्धारित २० ओभरमा ६ विकेट गुमाउँदै १५१ रन बनाएको थियो।
जवाफी ब्याटिङमा उत्रिएको पोखरा अन्तिम ओभर बाँकी छँदा १२१ रन बनाएर अलआउट भयो। पोखराका लागि अर्जुन कुमालले सर्वाधिक ४५ रन बनाउँदा युवराज साम्राले १९ तथा किरण ठगुन्नाले १३ रनको योगदान दिए। तीन ब्याटरले खातै खोलेनन्।
घातक बलिङ गर्नेक्रममा चितवनका रिजन ढकालले सर्वाधिक ४ विकेट लिँदा कमलसिंह ऐरीले ३ तथा डन मौउस्ले, मौसम ढकाल र कुशल मल्लले समान १ विकेट लिए।
टस हारेर ब्याटिङमा उत्रिएको चितवनले निर्धारित २० ओभरमा ६ विकेट गुमाएर १५१ रन बनाएको हो।
चितवनका लागि सिकन्दर रजाले सर्वाधिक ३७ रन बनाउँदा रवि बोपाराले ३५ रन बनाए। पहिलो विकेटका लागि अर्जुन साउद र डेभिड मलानले ६० रनको साझेदारी गर्दै इनिङ्स उकासेका थिए। साउदले ३१ रन बनाउँदा मलानले २८ रन बनाए।
बलिङमा पोखराका चमिका करुणारत्ने, कुशल भुर्तेल र विपिन खत्रीले समान २ विकेट लिए।
आजको खेलमा कुशल मल्ल चितवन राइनोजको टोलीमा फर्किएका छन्। यसअघिका दुई सिजनमा कप्तानी गरेका मल्ल यस संस्करणमा भने पहिलो पटक मैदान उत्रिए।
अर्कोतर्फ पोखरा एभेन्जर्सले कुशल भुर्तेललाई कप्तानीबाट हटाएको छ। सकिव अल हसन पनि आज पोखरामा छैनन्। पोखरा अझै सिजनको पहिलो जितकै खोजीमा छ।
जारी सिजनको एकमात्र जितविहीन टोली पोखरा लगातार चार हारले संकटमा परेको छ। प्लेअफमा पुग्ने सम्भावना अब न्युन हुँदै गएको छ। अर्कोतर्फ पाँच अंक बनाएर चितवन तालिकाको तेस्रो स्थानमा उक्लिएको छ।
शनिबार काठमाडौं गोर्खाज र लुम्बिनी लायन्स भिड्नेछ्न्।
