काठमाडौं। नापी कार्यालय, नवलपरासी (बर्दघाट सुस्ता पश्चिम)का सर्भेक्षक विन्देश्वर शाह सुडीविरुद्ध गैरकानूनी सम्पत्ति आर्जनको अभियोगमा विशेष अदालतमा मुद्दा दायर भएको छ।
अख्तियार दुरुपयोग अनुसन्धान आयोगले सुडीले ३ करोड ७१ लाख ८४ हजार रुपैयाँ बराबरको अवैध सम्पत्ति आर्जन गरेको अभियोगमा मंगलबार अदालतमा मुद्दा दायर गरेको हो।
सुडीले अमिन पदमा अस्थायी नियुक्ति लिएको मिति २०४६ वैशाख १६ देखि २०८१ जेठ मसान्तसम्म उनको नाममा ९ करोड ७५ लाख ६९ हजार बराबरको सम्पत्ति देखिएकामा ६ करोड ३ लाख ८५ हजारको मात्र स्रोत खुलेको अख्तियारले बताएको छ।
अख्तियारले अवैध रूपमा आर्जित सम्पत्ति जफत गर्ने प्रयोजनका लागि सुडीकी पत्नी सुमित्रादेवी शाहलाई पनि प्रतिवादी बनाएको छ। अख्तियारले सुडीको सम्पत्तिलाई लिएर उजुरी परेपछि अनुसन्धान गरेको थियो।
