लियोनेल मेस्सीले विश्वकप इतिहासकै आफ्नो पहिलो ह्याट्रिक पूरा गर्दै साबिक विजेता अर्जेन्टिनालाई समूह चरणको उद्घाटन खेलमा अल्जेरियाविरुद्ध ३–० को सहज जित दिलाएका छन्।

अमेरिकाको कन्सास सिटीको एरोहेड स्टेडियममा मंगलबार राति भएको खेलमा मेस्सीले सुरुआती मिनेटमै आफ्ना इन्टर मायामी सीएफका सहकर्मी रोड्रिगो डे पाउलको उत्कृष्ट पासमा पहिलो गोल गरेका थिए। दोस्रो गोल उनले दोस्रो हाफको सुरुमै थपे भने तेस्रो गोल खेल सकिन केही समय बाँकी रहँदा गरे। त्यसलगत्तै उनी मैदानबाट बाहिरिँदा अर्जेन्टिनाका समर्थकहरूले उभिएर सम्मान व्यक्त गरेका थिए।

मेस्सीका लागि यो उपलब्धि विशेष रह्यो। उनले अर्जेन्टिनाका लागि विश्वकपमा डेब्यु गरेको ठीक २० वर्ष पूरा भएकै दिन ह्याट्रिक गरेका हुन्। सन् २००६ मा सर्बिया एन्ड मोन्टेनेग्रोविरुद्धको आफ्नो पहिलो विश्वकप खेलमा पनि उनले गोल गरेका थिए।

यी तीन गोलसँगै विश्वकपमा उनको कुल गोल संख्या १६ पुगेको छ। यससँगै उनले जर्मनीका मिरोस्लाभ क्लोससँग विश्वकप इतिहासमा सर्वाधिक गोलकर्ताको कीर्तिमान बराबरी गरेका छन्।

यस जितले अर्जेन्टिनालाई अघिल्लो विश्वकपको तुलनामा निकै राम्रो सुरुआत दिलाएको छ। चार वर्षअघि कतार विश्वकपमा अर्जेन्टिना पहिलो खेलमै साउदी अरेबियासँग पराजित भएको थियो। तर त्यसपछि टोलीले उत्कृष्ट पुनरागमन गर्दै तेस्रो विश्वकप उपाधि जितेको थियो।

आउँदो साता ३९ वर्ष पुग्न लागेका मेस्सी खेलअघि ह्यामस्ट्रिङको सामान्य चोटका कारण चर्चामा थिए। तर मैदानमा उनले त्यसको कुनै असर देखाएनन्। उनले थप दुई गोल गर्ने अवसर पनि सिर्जना गरेका थिए। एउटा गोल अफसाइडका कारण रद्द भयो भने अर्को प्रहार क्रसबारमाथिबाट बाहिरियो।

अर्जेन्टिनाको बलियो प्रदर्शनका बीच अल्जेरियाको उत्कृष्ट अवसर खेलको सुरुमै आएको थियो। फारेस चाइबीले गरेको गोल भीएआर समीक्षा पछि अफसाइड ठहरिँदै रद्द गरिएको थियो। त्यसको केही क्षणपछि मेस्सीले गोल गर्दै खेलको दिशा नै बदलिदिए।

एरोहेड स्टेडियममा भएको यो खेलले अमेरिकी फुटबल तथा फुटबल (सकर) विकासका महत्त्वपूर्ण अभियन्ता स्वर्गीय लामार हन्टको पुरानो सपना पनि पूरा गरेको मानिएको छ। अमेरिकामा विश्वकप आयोजना गराउने प्रयासमा उनको महत्त्वपूर्ण भूमिका थियो। उनका छोराहरू क्लार्क र ड्यान हन्ट अहिलेको संस्करणको आयोजनामा सक्रिय छन्।

खेलका लागि अनुकूल मौसमका बीच भएको खेल हेर्न दर्शकदीर्घामा अमेरिकन फुटबलका विश्वप्रसिद्ध खेलाडी प्याट्रिक महोम्स र उनकी पत्नी ब्रिट्नी महोम्स पनि उपस्थित थिए।

अर्जेन्टिनाले उपाधि रक्षा अभियानलाई निरन्तरता दिँदै सोमबार टेक्सासको आर्लिङ्टनमा अस्ट्रियासँग खेल्नेछ भने जुन २७ मा जोर्डनसँग प्रतिस्पर्धा गर्नेछ। अल्जेरियाले सोमबार क्यालिफोर्नियाको सान्टा क्लारामा जोर्डनसँग खेल्नेछ र त्यसपछि जुन २७ मा पुनः कान्सास सिटीमा अस्ट्रियासँग समूह चरणको अन्तिम खेल खेल्नेछ।