काठमाडौं। प्रहरीले स्रोत नखुलेको रकमसहित दुई युवकलाई नियन्त्रणमा लिएको छ।
पक्राउ पर्नेहरूमा काठमाडौंको कपन बस्ने रामेछापको खाँडादेवी गाउँपालिका-५ घर भएका २७ वर्षीय दीपक श्रेष्ठ र २५ वर्षीय सुनिल श्रेष्ठ हुन्।
काठमाडौं महानगरपालिका-१ स्थित जय नेपाल हल नजिकबाट स्रोत नखुलेको १० लाख ६३ हजार ८ सय ४० रूपैयाँसहित उनीहरूलाई शनिबार राति नियन्त्रणमा लिएको हो। प्रहरी वृत्त दरवारमार्गबाट खटिएको प्रहरीले हिटीपोखरीबाट नागपोखरीतर्फ जाँदै गरेको बा.प्र ०२-०५२ प ६९९४ नम्बरको स्कुटरमा सवार उनीहरूको साथबाट नगद फेला पारेको हो।
प्रहरीले यस सम्बन्धमा आवश्यक अनुसन्धान गरिरहेको जनाएको छ।
गत माघदेखि सरकारले ५ लाख रुपैयाँभन्दा बढी रकम बैंकिङ च्यानलबाट गर्न भनेको छ।
