काठमाडौं । तरलता अभाव भएर अधिकांस बैंकहरुल सरकारी ऋणपत्रको धितो (रिपो) मा पैसा उपलब्ध गराउन माग गरिरहेका बेल सरकारी स्वामित्वको एउटा बैंकले भने रिभर्स रिपोको माग गरेको छ । अत्याधिक तरलता भएका कारण सरकारी स्वामित्वको राष्ट्रिय वाणिज्य बैंकले रिभर्स रिपोको माग गरेको हो । रिभर्स रिपोमार्फत राष्ट्र बैंकमा पैसा राखेर व्याज खान पाइन्छ । यसको व्याज भने रिपोको भन्दा केही कम हुन्छ । राष्ट्रिय वाणिज्य बैंकमा दैनिक १० अर्ब रुपैयाँसम्म अन्तर बैंकमा सापटी दिन सक्ने क्षमता भएको प्रमुख कार्यकारी अधिकृत कृष्ण शर्माले बताए । उनले पछिल्लो समय साढे चारदेखि साढे ६ प्रतिशतसम्म अन्तर बैंक सापटी दिइरहेको जानकारी दिए ।
रिभर्स रिपोमार्फत अल्पकालिन रुपमा राष्ट्र बैंकमा पैसा राखिन्छ । राष्ट्र बैंकले विरलै मात्र रिभर्स रिपो कार्यान्वयनमा ल्याउने गरेको छ । बैंकहरुले रिपो जारि गर्न राष्ट्र बैंकसँग आग्रह गरिसकेका छन् । राष्ट्र बैंकले तत्काल रिपो जारि गर्ने संकेत गरेको छैन । कुनै बैंकमा अधिक र कुनै बैंकमा कम भएका कारण अन्तर बैंकबाटै व्यवस्थापन गर्न राष्ट्र बैंकले दवाव दिइरहेको छ । राष्ट्र बैंकले तरलता अभाव हुन थालेको भए निक्षेपको व्याज वढाउन समेत सुझाव दिइसकेको छ । अहिले एभरेष्ट, किस्ट, लक्ष्मी बैंकलगायतले अन्तर बैंकमा सापटी दिइरहेका छन् । सापटी माग्नेमा स्ट्यान्डर्ड चार्टर्ड बैंक नेपाल, हिमालयन बैंक, नबिल बैंकलगायतका छन् ।