काठमाडौं । उद्योग, वाणिज्य तथा आपूर्तिमन्त्री गौरी कुमारीले इलाम तथा झापामा उत्पादित चिया भारत निर्यातमा देखिएको समस्या समाधानका लागि कूटनीतिक प्रयास भइरहेको बताएकी छन्।
प्रतिनिधिसभाको आजको बैठकमा विनियोजन विधेयक, २०८३ अन्तर्गत उद्योग मन्त्रालयको विनियोजन शीर्षकमाथिको छलफलमा उठेका प्रश्नको जवाफ दिँदै उनले चिया तथा अलैँचीलगायत कृषि उपजको भण्डारण र बजारीकरणमा विशेष योजना बनाइएको बताइन्।
‘स्थानीय कृषि उपजको बजारको पहुँच अभिवृद्धि गर्न सम्बन्धित क्षेत्रका व्यवसायीसँगको लागत साझेदारीमा गोदाम घर निर्माणका लागि स्रोत व्यवस्थापन भइरहेको छ,’ उनले भनिन्।
दैलेखस्थित पेट्रोलियम अन्वेषण परियोजनाको ड्रिलिङ पूरा भई अन्तिम प्रतिवदेन प्राप्त हुने क्रममा रहेको जानकारी दिँदै उनले प्रतिवेदनको सुझाव अनुरुप सरकारले थप कार्य अघि बढाउने प्रतिबद्धता व्यक्त गरिन्।
‘धौवादी फलाम खानी संचालनका लागि मोडालिटी तय गरी विस्तृत अध्ययन प्रतिवेदन तयार गर्ने कार्य अघि बढाइनेछ,’ उनले भनिन्।
कुमारीले तीन महिनाको माग धान्ने गरी पेट्रोलियम पदार्थको भण्डारण क्षमता अभिवृद्धि गर्ने लक्ष्यअनुसार काम भइरहेको जानकारी दिइन्।
सिलगुडी–चारआली र मोतिहारी–अमलेखगन्ज–लोथर अन्तरदेशीय पेट्रोलियम पाइपलाइन निर्माण परियोजना अघि बढेको जानकारी दिँदै उनले सर्लाहीमा पेट्रोलियम पदार्थको भण्डारणस्थल निर्माणका लागि जग्गा व्यवस्थापन भएको र अन्य प्राविधिक कार्य नेपाल आयल निगमले गरिरहेको बताइन्।
‘औद्योगिक पूर्वाधार विकास कार्यक्रमअन्तर्गत कञ्चनपुरस्थित दैजीछेला औद्योगिक क्षेत्रमा पहुँच सडक स्तरोन्नति गरी औद्योगिक क्षेत्र निर्माण गरी उद्योगीलाई स्थान उपलब्ध गराउने कार्य अघि बढेको छ,’ उनले भनिन्।
