काठमाडौं। आकर्षक तलबको प्रलोभनमा पारी ‘बेलायत पठाइदिन्छु’ भन्दै रकम ठगी गरेको अभियोगमा एकजना पक्राउ परेका छन्।
भक्तपुरको मध्यपुर थिमि नगरपालिका-२ बस्ने ललितपुरको ललितपुर महानगरपालिका-१६ घर भएका ३४ वर्षीय अमन महर्जनलाई मंगलबार प्रहरीले पक्राउ गरेको छ।
अमनले बेलायत पठाइदिने भन्दै ३ जनाबाट २८ लाख रूपैयाँ लिई सम्पर्कविहीन भएका थिए। पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उनलाई मध्यपुर थिमि नगरपालिका-२ बाट पक्राउ गरेको हो।
उनलाई आवश्यक अनुसन्धान तथा कारबाहीका लागि काठमाडौंको ताहाचलस्थित वैदेशिक रोजगार विभाग पठाइएको प्रहरीले जनाएको छ।
