काठमाडौं। तिहार सुरु भएसँगै नागार्जुन नगरपालिकास्थित इचङ्गु क्षेत्र अहिले सुनौलो रङले भरिएको छ। सयपत्री फूल फुल्दा यहाँको वातावरण झन् रमणीय बनेको छ।
टाढाबाटै देखिने फूलबारीहरूले तिहारको आगमनलाई संकेत गरिरहेको छ।
यहाँका किसान अहिले फूल टिप्न व्यस्त छन्। बिहान सबेरै उठेर उनीहरू फूलबारीमा पुग्छन्। कसैले फूल टिप्छ, कसैले माला उन्छ, र कसैले बजारमा पठाउने तयारी गर्छ। घर-घरमा पनि फूलको सुगन्धले उत्सवको माहोल फैलिएको छ।
कृषकका अनुसार यस वर्ष तिहार केही अगाडि परेको हुँदा सयपत्री फूल पूर्ण रूपमा फुल्न पाएको छैन। तर जे फुलेका छन्, ती निकै मागमा छन्। बजारमा फूलको माग तीव्र देखिएपछि यसको मूल्य दोब्बर पुगेको छ।
बजारमा माग अत्यधिक भएकाले काठमाडौंका अन्य स्थानका व्यापारीहरू पनि इचङ्गु पुगेर फूल खरिद गरिरहेका छन्।
फूलबारीमा रमाइरहेका किसानहरूका अनुहारमा थकाइभन्दा बढी सन्तोष देखिन्छ। तिहारको चहलपहल र बजारको रौनकसँगै उनीहरूका परिश्रमले सहर सजिनेछ भन्ने भाव उनीहरूमा झल्किन्छ।
