काठमाडौं। राजावादीहरुले चैत १५ गते तीनकुनेमा गरेको प्रदर्शनका क्रममा हिंसा भड्कियो। निजी घर र गाडीमा तोडफोड र आगजनी भयो। प्रदर्शनकारीले कोटेश्वरस्थित भाटभटेनी सुपरमार्केटमा लुटपाट मच्चाए।

अहिले धेरैको प्रश्न छ, भाटभटेनीमा लुटपाट गर्नेहरु सबैलाई प्रहरीले पक्राउ गर्न सक्ला? उनीहरू कहाँका हुन् भन्ने जानकारी प्रहरीसँग नभएको अवस्थामा कसरी फन्दामा पर्लान्?

यो प्रकरणमा प्रहरीले अहिले तीन दर्जन मानिसको प्रोफाइल बनाएर खोजी गरिरहेको छ। तोडफोड र आगजनी तथा भाटभटेनी लुटपाटमा संलग्नलाई काठमाडौं उपत्यका अपराध अनुसन्धान कार्यालयले आधा दर्जन टोली खटाएर खोजी थालेको हो।

प्रहरीले सामाजिक संजालमा आएका तस्विर र भिडियो, समाचार र सीसी क्यामरामा कैद भएको फुटेजलाई खोजीको आधार बनाएको छ। भाटभटेनीबाट सामान चोर्नेहरूको फोटो र भिडियो अहिले सामाजिक संजालमा भाइरल छ। धेरैले चोरीमा संलग्नहरुको मिम समेत बनाइरहेका छन्।

प्रहरी प्रधान कार्यालयको निर्देशनमा काठमाडौं उपत्यका प्रहरी कार्यालयले तोडफोड, आगजनी र लुटपाटमा संलग्नहरुको सामाजिक संजाल अपडेट भन्ने पुस्तिका बनाएको छ। जहाँ प्रहरीले भेटिएसम्म कलर फोटो कलेक्सन गरेको छ। त्यसलाई नै आधार बनाएर खोजी गरिरहेको काठमाडौं उपत्यका अपराध अनुसन्धान कार्यालयका एसपी अंजुर जिसीले बताए।

‘हामीले सामाजिक संजालमा आएका भिडियो, फोटो र अन्य पक्षबाट आएका जानकारीलाई रेकर्डमा राखेर अनुसन्धान गरिरहेका छौं,’ एसपी जिसीले भने।

सामाजिक संजालमै भाइरल भएको फोटो र भिडियोको आधारमा प्रहरीले भाटभटेनी लुटपाटमा संलग्न ९ जनालाई पक्राउ गरिसकेको छ।

प्रहरीले संचार प्रविधिकै प्रयोग गरेर लुटपाट र तोडफोडमा संलग्न मानिसको पहिचान गरिरहेको छ। उनीहरु कहाँ बस्छन् भन्ने पनि पत्ता लगाउने काम भइरहेको जिसीले बताए।

प्रहरीले भाटभटेनीमा चोरी गर्नेहरु आसपासमै बस्ने आशंकामा त्यो क्षेत्रमा पुगेर तस्विर र भिडियो देखाउँदै सोधपुछ गरी ९ जनालाई पक्राउ गरेको हो।

प्रहरीले १५ गते राति देखि नै सामाजिक संजाललाई सूक्ष्मरूपमा हेरिरहेको छ। सामाजिक संजालमा गरिएका कमेन्टलाई समेत प्रहरीको टिमले केलाइरहेको छ ।

सामाजिक संजालमा आएका फोटो र भिडियोमा केही मानिसले ‘यी मान्छे त मैले चिनेको हुँ’, ‘फलानो ठाउँमा बस्ने दिदी होइन?’ जस्ता कमेन्ट गरेका छन्। प्रहरी त्यही ‘क्लू’लाई पछ्याउँदै ती व्यक्तिकहाँ पुगिरहेको छ।

त्यस्तै, प्रहरीकहाँ पनि तोडफोड र लुटपाटमा संलग्नहरुबारे सूचना आउने गरेको छ। ‘हाम्रो आफ्नै सूचना प्रणाली छ। घटना भएको ठाउँमा पुगेर पनि सूचना लिइरहेका छौं,’ एसपी जिसीले भने।

लुटपाटमा संलग्नहरूकहाँ पुग्न प्रहरीले यसअघि चोरीमा पक्राउ परेकाहरुको समेत सहयोग लिइरहेको छ। केही दिनअघि भक्तपुरमा भएको चोरी प्रकरणमा समातिएका एक आरोपीको सहयोगमा भाटभटेनी लुटपाटमा संलग्न एकजनालाई पक्राउ गरेको प्रहरीले बताएको छ।