काठमाडौं। सानिमा रिलायन्स लाइफ इन्स्योरेन्सको आठौं वार्षिक साधारण सभाले सेयरधनीका लागि लाभांश प्रस्ताव पारित गरेको छ।
कम्पनी अध्यक्ष रतनलाल केडियाको अध्यक्षतामा काठमाडौंमा सम्पन्न भएको सभाबाट ८ प्रतिशत नगद लाभांश र १.२४८९ प्रतिशत बोनस सेयर वितरण प्रस्ताव पारित भएको हो। सभामा केडियाले कम्पनीको वार्षिक विवरण पेस गरे।
सभाले आव २०८०/८१ वार्षिक प्रतिवेदनसहित लेखा परीक्षण प्रतिवेदन तथा वित्तीय विवरण पारित गरेको छ। साथै सञ्चालक समितिले प्रस्ताव गरे बमोजिम विद्यमान चुक्ता पुँजी रु.४ अर्ब ९५ करोड ३० लाख ६५ हजार २ सय २४ रुपैयाँको ८ प्रतिशतका दरले हुने रकम रु.३९ करोड ६२ लाख ४५ हजार २१८ रुपैयाँ बराबरको नगद लाभांश (बोनस सेयर तथा नगद लाभांशमा लाग्ने करसहित) वितरण गर्ने साथै विद्यमान चुक्ता पुँजीको १.२४८९ प्रतिशतका दरले हुने रकम रु. ६ करोड १८ लाख ५८ हजार ८३२ रुपैयाँ बराबरको बोनस सेयर वितरण गर्ने प्रस्ताव पारित गरेको छ।
सभाले बोनस सेयर तथा नगद लाभांश वितरणपश्चात हुने सेयर संरचना बमोजिम जारी पुँजी र चुक्ता पुँजी वृद्धि गरि रु.५ अर्ब १ करोड ४९ लाख २४ हजार ५६ रुपैयाँ पुर्याउने र सोही बमोजिम कम्पनीको प्रबन्धपत्रमा संशोधन गर्ने प्रस्ताव पारित गरेको छ।
त्यसैगरी आव ०८१/८२ का लागि लेखा परीक्षक नियुक्ति र पारिश्रमिक निर्धारण प्रस्तावसमेत पारित गरेको छ। सभामा अध्यक्ष केडियाले सेवाग्राहीबीच आफ्नो पृथक पहिचान स्थापित गर्न कम्पनी प्रतिबद्ध रहेको बताए।
कम्पनीका प्रमुख कार्यकारी अधिकृत शिवनाथ पाण्डेले कम्पनीले गुणस्तरीय तथा विश्वसनीय व्यवसायको सबै परिसूचकहरुमा निरन्तर वृद्धि गरी उल्लेख गरे। आगामी वर्षहरुमा पनि कम्पनीलाई गुणस्तरीय तथा दीर्घकालीन व्यवसायमार्फत जीवन बीमा क्षेत्रमा अलग पहिचान दिलाउने अथक प्रयास रहेको उनले बताए।
