काठमाडौं । निर्जीवन बीमा कम्पनीहरुको व्यापारमा बढोत्तरी देखिएको छ। नेपाल बीमा प्राधिकरणका अनुसार ६ महिनामा ४ वटा लघुसहित १८ वटा इन्स्योरेन्स कम्पनीले २१ अर्ब ३० करोड ६५ लाख रुपैयाँ प्रिमियम संकलन गरेका छन्।

कम्पनीहरुले पोहोर दोस्रो त्रैमासको तुलनामा यस वर्ष आर्जन गरेको प्रिमियम ९.६० प्रतिशतले धेरै हो। इन्स्योरेन्सले पोहोर पुसम्म १९ अर्ब ४४ करोड १० लाख रुपैयाँ प्रिमियम आर्जन गरेका थिए।

प्राधिकरणका अनुसार युनाइटेड अजोड र प्रभु इन्स्योरन्स बाहेकका कम्पनीको व्यवसायमा बढोत्तरी देखिएको हो। गत वर्षको तुलनामा कम्पनीको बीमा लेख ८.०७ प्रतिशतले वृद्धि भएको छ।

कम्पनीहरुले यो वर्ष १५ लाख ५७ हजार बीमालेख जारी गरेका छन्। पोहोर यही अवधिमा १४ लाख ४१ हजार बीमालेख बिक्री गरिएको थियो।

शिखर इन्स्योरेन्सले सर्वाधिक २ अर्ब ५९ करोड रुपैयाँको प्रिमियम संकलन गर्दा सबैभन्दा न्यून नेसनल इन्स्योरेन्सले ६२ करोड १९ लाख रुपैयाँ आर्जन गरेको छ।