काठमाडौं। किशोरी साहित्यकार ऋतंभरा ढुंगानाको कविता संग्रह ‘टिनएजर्स डिलेमा एन्ड अदर पोएम्स’ सार्वजनिक भएको छ। नयाँ बानेश्वरस्थित पाठशाला नेपाल फाउन्डेसनमा कक्षा १० मा अध्ययनरत ऋतंभराको यो कृति बिहीबार आयोजित विशेष साहित्यिक समारोहमा विमोचन गरिएको हो।

फाउन्डेसनको मादनकृष्ण नाट्यशालामा आयोजना कार्यक्रममा साहित्य, शिक्षा, सञ्चार र अन्य विभिन्न क्षेत्रका विशिष्ट व्यक्तिहरू उपस्थित थिए।

प्रमुख अतिथि प्रा. डा. गोविन्दराज भट्टराई र विशेष अतिथि महेश पौडेल थिए। साथै, चर्चित साहित्यकारहरू रामजी प्रसाद उपाध्याय पोखरेल, डा. राम प्रसाद ज्ञवाली, पवन आलोक, र देविका तिमिल्सिनाले कार्यक्रमलाई आभासीय बनाएका थिए। पाठमाला नेपाल फाउन्डेसनका तर्फबाट कृष्ण खतिवडाले अतिथिहरूलाई स्वागत गरेका थिए।

कार्यक्रममा प्रमुख अतिथि प्रा. डा. गोविन्दराज भट्टराईले बालबालिकाको सिर्जनात्मक क्षमतामा आनुवंशिकता र पालनपोषणको प्रभाव रहेको उल्लेख गरे। उनले बालबालिकालाई साहित्यमा रुचि राख्न प्रेरित गरिरहन अभिभावकहरूलाई आग्रह समेत गरे।

विशेष अतिथि महेश पौडेलले ऋतंभराका आत्मसम्मान, मानवीय भावना र बालमनोविज्ञानसम्बन्धी कविताहरूको प्रशंसा गर्दै नयाँ पुस्ताका लेखकहरूलाई माया र धैर्यपूर्वक हेरिनु पर्ने आवश्यकता औँल्याए।

साहित्यकार रामजी प्रसाद उपाध्याय पोखरेलले यो भावुक क्षण सेयर गर्दै विद्यालय समुदायलाई धन्यवाद व्यक्त गरे। साहित्यकार डा. राम प्रसाद ज्ञवालीले उमेरले महानता प्राप्त गर्न बाधा नहुने बताउँदै सबैलाई अर्थपूर्ण प्रयास गर्न प्रेरित गरे।

त्यस्तै ऋतंभराले यो कविता संग्रह किशोरी अवस्थाका सोच, भावना र सपनाहरूको प्रतिबिम्ब भएको बताइन्। उनले आफ्ना कविता व्यक्तिगत अनुभवको झल्को भएको र हरेक कविता जीवनका तस्बिरहरू भएको उल्लेख गरिन्।

संग्रहमा किशोरकिशोरीहरूका आत्मशंका, सामाजिक दबाब र आत्मसम्मानका चुनौतीहरू जस्ता विषयहरूलाई भावनात्मक रुपमा प्रस्तुत गरिएको छ। सामाजिक सञ्जालको युगमा किशोरावस्थामा भोगिने संघर्ष र भावनात्मक उतारचढावलाई कवितामार्फत उजागर गरिएको छ।

६० पृष्ठको यो संग्रह शिखा बुक्सले प्रकाशित गरेको हो। यसमा किशोरी अवस्थाका आत्मअन्वेषण र भावनात्मक गहिराइमा आधारित ३६ वटा कविता समावेश छन्।