अत्तरिया। कैलालीको धनगढीमा आइतबारदेखि सुरु भएको सुदूरपश्चिम प्रदेशस्तरीय ‘श्रमाधान रोजगार मेला’मा पहिलो दिन २ हजारभन्दा बढीले रोजगारीका लागि आवेदन दिएका छन्।

श्रम, रोजगार तथा सामाजिक सुरक्षा मन्त्रालय, सुदूरपश्चिम प्रदेशको सामाजिक विकास मन्त्रालय र धनगढी उपमहानगरपालिकाको संयुक्त आयोजनामा सुरु भएको रोजगार मेलामा आइतबार रोजगारीका लागि २ हजार २ सय ५० जनाले आवेदन दिएका हुन्।

रोजगार मेलामा रोजगारीका लागि विभिन्न पदमा १ हजार २ सय ५० जनाले अनलाइनमार्फत र १ हजार जनाले प्रत्यक्ष उपस्थित भएर आवेदन दिएका श्रम, रोजगार तथा सामाजिक सुरक्षा मन्त्रालयका उपसचिव वसन्तबहादुर बोहराले जानकारी दिए। उनका अनुसार रोजगार मेलामा विभिन्‍न रोजगारदाताका २८ र सरकारी सेवा प्रवाहसम्बन्धी जानकारी दिने १० सरकारी कक्ष गरी ३८ कक्ष रहेका छन्।

दुई दिने श्रमाधान रोजगार मेलामा रोजगारदाताबाट रोजगारीका लागि २ हजार ६ सय ३४ आवेदन माग गरिएको उनले जानकारी दिए। पहिलो दिन प्रदेशका ९ वटै जिल्लाका ५ हजार जनाले मेलाको अवलोकन गरेको उनले जानकारी दिए।

आन्तरिक तथा वैदेशिक रोजगारसम्बन्धी परामर्शका साथै सार्वजनिक सेवा, जागिर पाउन सिक्नुपर्ने सीप, कुन विषय पढ्दा भविष्यमा चाँडो जागिर पाउन सकिन्छ लगायत विषयमा परामर्श हुने भएकाले मेला महत्त्वपूर्ण भएको उनले बताए।

आवेदन परेकाहरूलाई रोजगारदाताले सीप परीक्षणलगायत प्रक्रिया पूरा गरेर रोजगारी प्रदान गर्ने उनको भनाइ छ। मेलाको आइतबार उद्योग, वाणिज्य तथा आपूर्तिमन्त्री दामोदर भण्डारीले उद्घाटन गरेका थिए। श्रमाधान रोजगार मेला आज समापन हुने आयोजकले जनाएको छ। रासस