काठमाडौं। नेपाल पुनर्बीमा कम्पनीको प्रमुख कार्यकारी अधिकृत (सीइओ) पदका लागि ५ जनाको नाम सर्टलिस्टमा परेको छ।कम्पनीको सीइओ छनोट समितिको सोमबार बसेको बैठकले नाम सिफारिस गरेको हो।
समितिले सीइओ छनोटका लागि दामोदर भण्डारी, नारायणकुमार भट्टराई, बुद्धकाजी श्रेष्ठ, श्रीमान कार्की र सुरेन्द्र थापाको नाम सिफारिस गरेको छ।
भण्डारी नेपाल पुनर्बीमा कम्पनीका निमित्त सीइओ हुन् भने भट्टराई तत्कालिन गुँरास लाइफ इन्स्योरेन्सका पूर्वसीइओ हुन्। श्रेष्ठ तत्कालिन युनाइटेड इन्स्योरेन्सका पूर्वसञ्चालक हुन् भने कार्की तत्कालिन बीमा समितिका पूर्वकामु कार्यकारी निर्देशक तथा सिटिजन लाइफ इन्स्योरेन्सका पूर्वस्वतन्त्र सञ्चालक हुन्।
थापा तत्कालिन राष्ट्रिय बीमा संस्थानका पूर्वसहायक प्रशासक र अजोड इन्स्योरेन्सको पूर्वडेपुटी सीइओ हुन्।
सर्टलिस्टमा परेका उम्मेदवारको कार्ययोजना प्रस्तुतीकरण र अन्तर्वार्ताका लागि जेठ ११ गते मिति तय गरिएको छ।
कम्पनीले गत फागुन ७ गते सीइओका लागि दरखास्त आह्वान गरेको थियो। नेपाल रि सरकारी स्वामित्वको पुनर्बीमा कम्पनी हो। शंकर रायमाझीको कार्यकाल सकिएपछि कम्पनीमा सीइओ पद रिक्त छ।
