पूर्वी नाकाबाट तीन महिनामा ताजा तरकारीको आयात निर्यातभन्दा पाँच गुणा बढी

बिजमाण्डू
२०८० मंसिर ११ गते १२:०८ | Nov 27, 2023
पूर्वी नाकाबाट तीन महिनामा ताजा तरकारीको आयात निर्यातभन्दा पाँच गुणा बढी


झापा। पूर्वीनाका काँकडभिट्टाबाट चालु आर्थिक वर्षको तीन महिनामा निर्यातका तुलनामा पाँच गुणाभन्दा बढी ताजा तरकारी भारतबाट आयात भएको छ।

Tata
GBIME
Nepal Life

प्लान्ट क्वारेन्टिन कार्यालय काँकडभिट्टाको प्रथम त्रैमासिक अभिलेखअनुसार आर्थिक वर्ष २०८०/८१ को साउन, भदौ र असोजमा भारतबाट ४७ करोड ९७ लाख ६० हजार रुपैयाँ मूल्यबराबरको २३ हजार ९ सय ८८ मेट्रिक टन  तरकारी आयात भएको छ।

सोही अवधिमा नेपालबाट ९ करोड ६५ लाख ७२ हजार ८ सय रुपैयाँ मूल्यबराबरको ६ हजार ३० मेट्रिक टन तरकारी भारत निर्यात भएको कार्यालयका सूचना अधिकारी चन्द्रेश्वर ठाकुरले बताए। पूर्वीनाकाबाट हुने ताजा तरकारीको व्यापारमा चालु आवको तीन महिनामै ३८ करोड ३१ लाख ८७ हजार २ सय रुपैयाँ बराबरको व्यापार घाटा भएको छ।

नेपालबाट निर्यात हुने ताजा तरकारीमा बन्दाकोभी, मुला र गोलभेँडा छन्। यीमध्ये सबैभन्दा बढी ९ करोड ५४ लाख ७२ हजार रुपैयाँ बराबरको ५ हजार ९ सय ६७ मेट्रिक टन बन्दाकोभी भारततर्फ निर्यात भएको ठाकुरले जानकारी दिए।

यसैगरी तरकारीमा गोलभेँडा ५ लाख १२ हजार रुपैयाँ बराबरको २६ मेट्रिक टन र ५ लाख ८९ हजार बराबरको ३७ मेट्रिक टन मुला भारततर्फ निर्यात भएको छ। धनकुटा र इलाममा उत्पादित बन्दाकोभी, मुला र गोलभेँडा भारत निर्यात हुने गरेको छ।

१९ करोडभन्दा बढीको गोलभेँडा आयात

चालु आवको प्रथम त्रैमासिक अवधिमा भारतबाट गोलभेँडा मात्रै १९ करोड ३७ लाख ४० हजार रुपैयाँ मूल्यबराबरको ९ हजार ६ सय ८७ मेट्रिक टन आयात भएको छ।

सोही अवधिमा भारतबाट २ करोड ७ लाख ८० हजार रुपैयाँ बराबरको १ हजार ३९ मेट्रिक टन हरियो खुर्सानी र  ३ करोड ७१ लाख ८० हजार रुपैयाँ बराबरको १ हजार ८ सय ५९ मेट्रिक टन गाँजर निर्यात भएको छ। तरकारीमध्ये मुला र बन्दाकोभीचाहिँ भारतबाट आयात भएको छैन। धनकुटा, इलाम, झापा, मोरङ, सुनसरी लगायतका कोशी प्रदेशका जिल्लामा बन्दाकोभीको ठूलो मात्रामा उत्पादन हुँदै आएको छ।

कोदो र आलुमा पनि आयातको भर

मधेसदेखि हिमाली भेगसम्म उत्पादनको प्रचुर सम्भावना भएको कोदो र आलुमा समेत नेपालले भारतकै भर पर्नुपर्ने अवस्था छ। प्लान्ट क्वारेन्टिन कार्यालय काँकडभिट्टाका अनुसार चालु आवको प्रथम त्रैमासिक अवधिमा  २३ करोड ६१ लाख ६० हजार रुपैयाँ मूल्यबराबरको ४ हजार ९ सय २० मेट्रिक टन कोदो भारतबाट आयात भएको छ।

सोही अवधिमा भारतबाटै ९९ करोड ८९ लाख ४ हजार रुपैयाँ मूल्यबराबरको ४१ हजार ६ सय २१ मेट्रिक टन आलु आयात भएको कार्यालयले जनाएको छ। तीन महिनामा १ अर्ब ८६ करोड ६५ लाख ६३ हजार रुपैयाँ मूल्यबराबरको ३६ हजार ७ सय ३० मेट्रिक टन फलफूल भारतबाट आयात भएको छ।

यसैगरी उक्त अवधिमा  २ करोड ५९ लाख ९२ हजार रुपैयाँ मूल्यबराबरको ३ सय ६१ मेट्रिक टन चना, ९ करोड २२ लाख ४ हजार मूल्यबराबरको एक हजार ३६ मेट्रिक टन मुसुरो दाल, १२ करोड ८६ लाख मूल्यबराबरको १ हजार २ सय ८६ मेट्रिक टन लसुन र ९८ लाख ५६ हजार मूल्यबराबरको ६ सय १६ मेट्रिक टन उखु भारतबाट आयात भएको छ।

पूर्वीनाका काँकडभिट्टाबाट चालु आवको तीन महिनामा खाद्यान्न, ताजा तरकारी, दलहन, तेलहन, फलफूल, बोटबिरुवा, प्रशोधित सामग्री, काठका सामान, मसाला बाली र बीउबिजन गरेर कुल ५ अर्ब १० करोड ६० लाख ३१ हजार रुपैयाँ मूल्यबराबरको आयात भएको कार्यालयका सूचना अधिकारी ठाकुरले जानकारी दिए।

सोही अवधिमा तरकारी, जडीबुटी, प्लाइउडका सामान, अम्रिसो लगायतका कुल ५ अर्ब २७ करोड ३६ लाख २९ हजार मूल्यबराबरको नेपाली उत्पादन भारत, बंगलादेशलगायतका मुलुकमा निर्यात भएको छ। रासस