काठमाडौं। नेपाल राष्ट्र बैंकले विदेशबाट धेरै रेमिटेन्स भित्र्याउने बैंक तथा कम्पनीहरुलाई सम्मान गरेको छ। राष्ट्र बैंकले आफ्नो ६८औं वार्षिकोत्सवको अवसरमा ६ वटा कम्पनीलाई सम्मान गरेको हो।
वाणिज्य बैंकहरुको तर्फबाट सबैभन्दा बढी हिमालयन बैंकले रेमिटेन्स भित्र्याएको छ। बैंकले कुल रेमिटेन्स आप्रवाहको १६.९ प्रतिशत भित्र्याएको छ। योबाहेक नेपाल एसबीआइ बैंकले १६.७७ प्रतिशत र ग्लोबल आइएमइ बैंकले १५.६५ प्रतिशत रेमिटेन्स भित्र्याएका छन्।
रेमिटेन्स कम्पनीका तर्फबाट सबैभन्दा बढी आइएमइ लिमिटेडले ३१.१२ प्रतिशत, सिटी एक्सप्रेसले १४.९२ र प्रभु मनी ट्रान्सफरले १०.९१ प्रतिशत रेमिटेन्स भित्र्याएका छन्।
राष्ट्र बैंकले कसले कति रकमको भित्र्यायो भनेर उल्लेख भने गरेन। गभर्नर महाप्रसाद अधिकारीले रेमिटेन्स बढी भित्र्याउने कम्पनीका प्रमुखहरुलाई सम्मान गरेका हुन्।
