काठमाडौं। सांग्रिला डेभलपमेन्ट बैंकले आफ्नो २२औं वार्षिक साधारण सभा सम्पन्न गरेको छ। साधारण सभाले १०.५२ प्रतिशत लाभांश वितरण गर्ने प्रस्ताव पारित गरेको छ।
बैंकले चुक्ता पुँजी ३ अर्ब ७३ करोड ४० लाखको ६.५२ प्रतिशत अर्थात २४ करोड ३६ लाख ९७ हजार नगद लाभांश र ४ प्रतिशत अर्थात १४ करोड ९३ लाख ६२ हजार रुपैयाँ बराबरको बोनस सेयर वितरण गर्ने प्रस्ताव पारित गरेको हो।
प्रस्ताव पारित भएसँगै बैंकको चुक्ता पुँजी ३ अर्ब ८८ करोड ३४ लाख रुपैयाँ पुगेको छ।
साधारण सभाले आगामी ४ वर्षका लागि ६ सदस्यीय नयाँ सञ्चालक समिति समेत निर्विरोध चयन गरेको छ। संस्थापक सेयरधनीका तर्फबाट उज्ज्वल सत्याल, सुशीलकाजी बानियाँ र श्यामकुमार शर्मा तथा सर्वसाधारण सेयरधनीका तर्फबाट विष्णुप्रसाद ढकाल, कृष्णप्रसाद रेग्मी र भावना अग्रवाल चयन भएका हुन्।
नवनिर्वाचित सञ्चालक समिति सदस्यको बैठकले उज्ज्वल सत्याललाई अध्यक्ष चयन गरेको छ। सत्याल यसअघि पनि अध्यक्ष थिए। सुशीलकाजी पनि दोहोरिएका हुन्। अरु भने नयाँ अनुहार हुन्।
