काठमाडौं। नेपाल स्टक एक्सचेन्ज(नेप्से)मा बिहीबार दुई कम्पनीको बोनस सेयर सूचीकृत भएको छ। माउन्टेन इनर्जी नेपाल र महालक्ष्मी विकास बैंकको ४६ लाख ४६ हजार २४२.१६ कित्ता बोनस सेयर थपिएको हो।
माउन्टेन इनर्जीको ३३ लाख ९४ हजार ८४६.५८ कित्ता बोनस सेयर सूचीकृत भएको छ। कम्पनीले आर्थिक वर्ष २०८०/८१ को मुनाफाबाट सेयरधनीलाई १५ प्रतिशत बोनस सेयर वितरण गरेको थियो।
बोनस सेयर वितरणपछि कम्पनीको चुक्ता पुँजी २ अर्ब ६० करोड २७ लाख रुपैयाँ पुगेको छ।
त्यस्तै, महालक्ष्मी विकास बैंकको १२ लाख ५१ हजार ३९५.५८ कित्ता सेयर सूचीकृत भएको छ। बैंकले सेयरधनीलाई गत वर्षको मुनाफाबाट ३ प्रतिशत बोनस सेयर वितरण गरेको थियो।
बोनस सेयर थपिएपछि महालक्ष्मीको चुक्ता पुँजी ४ अर्ब २९ करोड रुपैयाँ पुगेको छ।
