काठमाडौं। पृथ्वी राजमार्गअन्तर्गत मलेखु-मुग्लिङ सडक खण्डको जवाङ खोला क्षेत्रमा अवरुद्ध सडक शुक्रबार बिहान ३:४० बजेदेखि दुईतर्फी रूपमा संचालनमा आएको छ।

पहिरो हटाएपछि यातायात पुनः संचालनमा आए पनि सडक अझै पूर्ण रूपमा सुरक्षित भइनसकेको प्रहरीले जनाएको छ। जवाङ खोला क्षेत्रमा खसेको पहिरो हटाएर दुवैतर्फ सवारी आवागमन खुलाइएको हो।

यद्यपि, सडकमा पहिरोका केही अवशेष अझै बाँकी छन्। अझै वर्षा हुन सक्ने सम्भावना रहेकाले सडक चिप्लो हुने जोखिम पनि कायम रहेको सम्बन्धित निकायले जनाएको छ।

यही कारण यस सडक भएर यात्रा गर्ने यात्रु र सवारी चालकलाई विशेष सावधानी अपनाउन आग्रह गरिएको छ। लेन अनुशासन पालना गर्दै सुरक्षित र संयमित रूपमा सवारी चलाउन अनुरोध गरिएको छ।

मनसुन सक्रिय रहेकाले पृथ्वी राजमार्गका विभिन्न स्थानमा पहिरो खस्ने जोखिम अझै छ। यात्रा अघि सडकको पछिल्लो अवस्था बुझेर मात्र यात्रा गर्न र आवश्यक सतर्कता अपनाउन पनि आग्रह गरिएको छ।