काठमाडौं। स्नो रिभर्स लिमिटेडले आइपीओ निष्कासन गरेको छ। कम्पनीले पहिलो चरणमा आयोजना प्रभावित क्षेत्रका स्थानीय र वैदेशिक रोजगारीमा रहेका श्रमिकलाई सेयर निष्कासन गरेको हो।
स्नो रिभर्सले आयोजना प्रभावित क्षेत्रका स्थानीयलाई ९ करोड ३७ लाख ५० हजार रुपैयाँ बराबरको ९ लाख ३७ हजार ५०० कित्ता सेयर छुट्याएको छ।
अति प्रभावित क्षेत्र ताप्लेजुङको सिरिजङा गाउँपालिका-८ का स्थानीयलाई ४ लाख ६८ हजार ७५० कित्ता र सिरिजङा-१, २, ३, ४, ५, ६ र ७, सिदिङ्वा गाउँपालिका-५ र ६, पाथिभरा याङवारक गाउँपालिका-५ र ६ तथा पाँचथरको हिलिहाङ गाउँपालिका-१ का स्थानीयलाई ४ लाख ६८ हजार ७५० कित्ता सेयर छुट्याइएको छ।
आयोजना प्रभावित क्षेत्रका स्थानीयले प्रति कित्ता १०० रुपैयाँमा सोमबारदेखि आवेदन दिन पाउनेछन्। बिक्री प्रबन्धकका अनुसार स्थानीयले छिटोमा चैत २३ गते र ढिलोमा २०८३ वैशाख ८ गतेसम्म आवेदन दिन सक्नेछन्।
यस्तै, वैदेशिक रोजगारीमा रहेका श्रमिकलाई कम्पनीले ९३ हजार ७५० कित्ता सेयर छुट्याएको छ। वैदेशिक रोजगारीमा गएकाले चैत ९ देखि १२ गतेसम्म आइपीओमा आवेदन दिन सक्नेछन्।
आयोजना प्रभावित क्षेत्रका स्थानीयले न्यूनतम १० देखि १० हजार कित्ता सेयरका लागि आवेदन दिन पाउनेछन्। वैदेशिक रोजगारीमा रहेका श्रमिकले १० देखि १ हजार कित्ता सेयर खरिदका लागि आवेदन दिन पाउनेछन्।
स्नो रिभर्सले जारी पुँजी ९३ करोड ७५ लाख रुपैयाँको २० प्रतिशतले हुन आउने १८ करोड ७५ लाख रुपैयाँको १८ लाख ७५ हजार कित्ता सेयर बिक्रीको अनुमति पाएको छ।
कम्पनीले निष्कासनका लागि गराएको रेटिङमा इक्रा नेपालले इक्राएनपी इस्यूअर रेटिङ डबल बी प्लस दिएको छ। यसले कम्पनीको दायित्व बहन गर्ने क्षमतामा मध्यम जोखिम रहेको जनाउँछ।
स्नो रिभर्स कम्पनीले संचालन गरेको १३.५ मेगावाटको सुपर काबेली खोला ए जलविद्युत् आयोजनाको कुल लागत २ अर्ब ७१ करोड ९० लाख ८५ हजार रुपैयाँ छ। कम्पनीको सेयर निष्कासन तथा बिक्री प्रबन्धक सानिमा क्यापिटल छ।
आर्थिक वर्ष २०८२/८३ को पुससम्म कम्पनीको प्रति सेयर आम्दानी ४.९८ रुपैयाँ र प्रति सेयर नेटवर्थ १०७.४६ रुपैयाँ छ। यस्तै, संचित मुनाफा ५ करोड ५९ लाख रुपैयाँ रहेको कम्पनीले विवरण पत्रमा उल्लेख गरेको छ।
