काठमाडौं। भुटानमा भएको चार देशीय बक्सिङ च्याम्पियनसिपमा सहभागी नेपाली टोली स्वदेश फर्किएको छ। बुधबार स्वदेश फर्किएको टोलीलाई विमानस्थलमा स्वागत गरिएको छ।
बक्सिङ प्रतियोगितामा नेपाल ४ स्वर्ण, ३ रजत र २ कास्य पदक जित्दै दोस्रो बनेको हो। त्यस्तै, भुटान ७ स्वर्ण, ५ रजत र ४ कास्यसहित पहिलो हुँदा भारत १ स्वर्ण, ५ रजत र २ कास्यसहित तेस्रो तथा बंगलादेश १ स्वर्ण र ३ कास्यसहित चौथो भए।
महिला ५० केजी तौल समूहमा भुटानकी जामो जिग्दाललाई ५-० अंकले पराजित गर्दै आरती बम्जनले नेपाललाई पहिलो स्वर्ण दिलाइन्। महिला ५२ केजीमा नेपालकी अस्मिता दुवालले भुटानकै डेमो नोर्नुलाई ५-० अंकले हराउँदै नेपाललाई दोस्रो स्वर्ण दिलाइन्।
त्यसैगरी, महिला ५४ केजीमा नेपालकी वर्षा श्रेष्ठले भुटानकै लामो तासीलाई ४-१ अंकले पछि पार्दै स्वर्ण जितिन्। पुरुष ४८ केजी समूहमा नेपालका लक्ष्मण राईले भारतका कृष्ण कैलाश राईलाई ५-० अंकले हराउँदै स्वर्ण जिते।
यस्तै, पुरुष ४८ केजीमा नेपालका लालप्रसाद उप्रेती भुटानका दोर्जे मगरसँग ४-१ अंकले पराजित हुँदै रजत पदक जिते। पुरुष ५४ केजीमा चन्द्रबहादुर थापाले बंगलादेशका महोमद उन्सोवसँग फाइनलमा ३-२ अंकले पराजित हुँदै रजत जिते।
महिला ४८ केजीमा रमिशा श्रेष्ठ र बक्समान्डुबाट सहभागिता जनाएका छिरिङ वाङ्दी शेर्पाले पुरुष ६० केजी समूहमा कास्य पदक जिते।
भुटान बक्सिङ संघको आयोजनामा प्रतियोगिता चैत २९ देखि ३१ गतेसम्म भएको थियो। प्रतियोगितामा नेपाल, भारत, भुटान र बंगलादेश सहभागी थिए।
