काठमाडौं। नेपाल माइक्रो इन्स्योरेन्सको सेयर नेपाल स्टक एक्सचेञ्ज(नेप्से)मा सूचीकृत भएको छ। नेप्से र कम्पनीबीच बिहीबार सूचीकरण सम्झौता भएको हो।
नेप्सेमा सूचीकरण भएसँगै इन्स्योरेन्सको सेयर आइतबारदेखि दोस्रो बजारमा कारोबार हुनेछ। दोस्रो बजारमा पहिलो कारोबारका लागि नेप्सेले कम्पनीको नेटवर्थको तीन गुणासम्म ओपनिङ रेन्ज दिंदै आएको छ।
आइपीओ निष्कासनका लागि नेपाल धितोपत्र बोर्ड(सेबोन)मा पेस गरेको वित्तीय विवरणअनुसार गत असार मसान्तसम्म उक्त इन्स्योरेन्स कम्पनीको प्रति सेयर नेटवर्थ १०१.३६ रुपैयाँ छ। यस आधारमा कम्पनीको सेयरले दोस्रो बजारमा अधिकतम ३०४ रुपैयाँसम्म ओपनिङ रेन्ज पाउँछ।
नेप्सेले उक्त कम्पनीको सेयरलाई १००.८० रुपैयाँदेखि ३०२.४० रुपैयाँको ओपनिङ रेन्ज दिएको छ।
कम्पनीले फागुन ११ देखि १५ गतेसम्म सर्वसाधारणका लागि आइपीओ निष्कासन गरेको थियो। कम्पनीले चुक्ता पुँजी ७५ करोड रुपैयाँको अंकित मूल्य १०० रुपैयाँमा २२ लाख ५० हजार कित्ता सेयर निष्कासन गरेको हो।
इन्स्योरेन्सको आइपीओ निष्कासन तथा बिक्री प्रबन्धकको काम एनआइएमबि एस क्यापिटलले गरेको थियो।
