काठमाडौं। नेपाल क्लियरिङ हाउस (एनसीएचएल)ले रिटेल भुक्तानी स्वीच (आरपीएस)मार्फत हुने ५०० रुपैयाँसम्मको फण्ड ट्रान्सफरमा शुल्क नलाग्ने व्यवस्था गरेको छ।
सानो रकमका भुक्तानी डिजिटल माध्यमबाट गर्न प्रोत्साहन गर्ने उद्देश्यले ५०० रुपैयाँ सम्मको फण्ड ट्रान्सफरमा शुल्क नलाग्ने व्यवस्था गरेको एनसीएचएलले जनाएको छ।
कम्पनीका अनुसार कनेक्ट आइपीएसको वेब/मोबाइल एप, बैंक वित्तीय संस्थाको मोबाइल बैंकिङमा रहेको कनेक्ट आइपीएस फण्ड ट्रान्सफर तथा कनेक्ट आइपीएसमार्फत मोबाइल वालेटमा गरिने ५०० रुपैयाँसम्म इन आउटलाई पूर्णरुपमा नि:शुल्क गरिएको छ।
कम्पनीले यो व्यवस्था कनेक्ट आइपीएसमा चैत १९ गतेबाट कार्यान्वयनमा आइसकेको जनाएको छ। कम्पनीका अनुसार बैंक वित्तीय संस्था र वालेटहरुले आफ्ना प्रणालीहरुमा आवश्यक व्यवस्था मिलाए पछि मोबाइल बैंकिङ तथा वालेटमा पनि क्रमिकरूपमा लागू हुनेछ।
आइआरपीएसमार्फत हुने अन्य कारोबारमा भने कारोबार रकमका आधारमा हाल कायम रहेको २ र ८ रुपैयाँ शुल्कको व्यवस्था यथावत छ।
आरपीएसमार्फत चालु आर्थिक वर्ष आठ महिनामा ४ हजार ५५३ अर्ब रुपैयाँ बराबरको ६ करोड ८३ लाख भुक्तानी कारोबार भइसकेको छ।
हाल ५२ वटा बैंक तथा वित्तीय संस्थाहरुको मोबाइल बैंकिङ एपमा आरपीएस/कनेक्ट आइपीएसबाट फण्ड ट्रान्सफर गर्न सकिने सेवा उपलब्ध छ। यस्तै १३ वटा वालेटमा बैंक खाताबाट क्यास इन आउटको सेवा उपलब्ध छ।
