वीरगंज (पर्सा)। तीन दशकअघिसम्म वीरगंजको बजारमा एक प्याकेट दूधको चिया पकाएर बेच्नका लागि रामनिवास शर्मालाई चोक–चोकमा भौँतारिनुपर्दथ्यो। एक केट्ली चिया बिक्री हुने/नहुने कुनै ‘ग्यारेन्टी’ हुँदैन्थ्यो। तर उनी कहिल्यै विचलित भएनन्। एक न एक दिन त व्यापारले गति लिनेछ, नगरबासीले चिया मन पराउने छन् भनेर आफ्नो काममा लागिरहे।

परिणामस्वरुप उनको पसल बब्लु टी स्टल अहिले सम्भवतः वीरगंजकै सबैभन्दा धेरै चिया बिक्री गर्नेमा पर्छ। उनले चर्चित टी स्टालका सञ्चालकका रुपमा परिचय कमाएका छन्। भारतको राजस्थान स्थायी घर भएका शर्माको वीरगंज बसाइमा सुरुआती दिन चिया बेच्न सहज थिएन।

‘३० वर्षअघि त शनिबार वीरगंजका सबैजसो बजार ठप्प जस्तै हुने गर्थ्यो। आफैंले एक प्याकेट दूधको चिया बनाएर केट्लीमा टोलटोलमा बेच्न गएर ग्राहक लोभ्याउनुपर्ने हुन्थ्यो,’ शर्माले विगत स्मरण गरे, ‘त्यतिबेला बिहान ४ बजेदेखि पसल खोलेर ग्राहकको चियाको तलतल मेट्ने काममा भने निरन्तर रुपमा लागिरहेँ। जसको कारणले पनि अहिले हाम्रो चिया भन्ने बित्तिकै मानिसहरु भुतुक्कै हुने गर्नुहुन्छ।’

शर्माले आफ्नो कान्छो छोरा बब्लुका नामबाट पसल चलाएका हुन्। घडीअर्वा पोखरीभन्दा डेढ सय मिटर दक्षिणतर्फ रहेको ‘बब्लु टी स्टाल’ तीन दशकदेखि सञ्चालनमा छ। शर्माले अहिले दैनिक ८० देखि १०० लिटर दूधको चिया बेच्छन्। पसलमा दैनिक ८०० देखि एक हजार कपको औसतमा चिया बिक्री हुने गर्छ।

‘सुरु–सुरुमा त डेढ रुपैयाँ कप चिया पनि बेचियो,’ उनी भन्छन्, ‘समयको अन्तरालसँगै अहिले चियाको मूल्य भने धेरै नै बढिसक्यो।’ टी स्टलमा चियाका पारखीको आउजाउमा कहिल्यै कमी आएको छैन। शर्मा नेपाल आफ्नो कर्मभूमि भएको बताउँछन्।

‘भारतको राजस्थान राज्य मेरो जन्मभूमि भए पनि नेपाल मेरो कर्मभूमि हो,’ उनले भने, ‘कामको सिलसिलामा ५५ वर्षअघि राजस्थानबाट आएको हुँ। सुरुआतमा त वीरगंजको महावीर गल्लीमा विभिन्न पसलमा पनि काम गरेँ। त्यसबाट खासै सन्तुष्टि नलागेर चिया पसल खोलेको हुँ।’

शर्मा आफैं पनि वीरगंजको अन्य ठाउँको तुलनामा आफ्नो चियाको गुणस्तर र स्वाद राम्रो हुने गरेकाले मूल्य पनि महँगो रहेको स्वीकार्छन्। सामान्यतया वीरगंजका बजारमा एक सानो कप चियाको मूल्य रु २० पर्ने गर्छ। तर, यहाँ भने एक कप मट्का चियाको मूल्य ३५ रुपैयाँ छ। गुणस्तरीय चियाका कारण ग्राहकले महँगो भयो भनेर गुनासो गरेको उनले सुन्नु परेको छैन।

‘वीरगंजको अरु ठाउँका चिया पसलको तुलनामा हाम्रो चिया महँगो नै छ। हाम्रो चिया ‘बढिया’ भएकाले पनि धेरै मूल्य परेको हो,’ उनले भने, ‘हामीले सकेसम्म कृषकको घरबाट सोझै भैंसीको शुद्ध दूध ल्याएर चिया पकाउने गर्छाैं। किसानलाई दूधको उचित मूल्य दिएकै कारणले पनि चियाको मूल्य बढी पर्ने गरेको हो।’

देहातबाट औसतमा १०० देखि ११० रुपैयाँ प्रतिलिटरमा भैंसीको दूध खरिद गर्दै आइरहेको उनले बताए। आफूले प्रयोग गर्ने चियापत्ती पनि भारतको असमबाट ल्याउने गरेको उनी बताउँछन्। ‘हामीले चियापत्ती एक पटक मात्रै प्रयोग गर्ने गर्छौं। दोस्रो पटक त्यो चियापत्तीको प्रयोग गर्दैनौँ,’ उनले भने, ‘आसामबाट ल्याएको चियापत्ती र देहातको भैँसीको शुद्ध दूधका कारणले पनि चियाको चुस्की राम्रो भएको होला कि !’ शर्मा आफैं वीरगंजमा मट्का चियाको सुरुआतकर्ता नभएको बताउँछन्।

‘हामीले भन्दा पहिले अरूले नै मट्का चिया बेच्दै आएका थिए तर अरूले मट्का चिया पसललाई निरन्तरता दिन सकेनन्,’ उनले भने, ‘मट्कावाला चियाको स्वाद नै अर्कै हुन्छ। माटोका भाँडाको स्वादले पनि ग्राहक लोभिँदै आइरहनुभएको छ।

हातले नै बनाएका मट्काको प्रयोग गर्ने भएकाले पनि स्वादमा ठूलो अर्थ राख्ने उनको भनाइ छ। उमेरले ७९ वर्ष पारे गरे पनि शर्माको जाँगरमा कमी भएको छैन। बिहान ४ बजे उठेर चिया पसल खोल्न र साँझसम्म आफैं चिया पकाएर ग्राहकलाई दिने गरेका छन्।

शर्माका तीन छोरा छन्– सनोदकुमार, योगेशकुमार र बब्लु। बब्लु र अर्का एक छोराले चियापसलमा सहयोग गर्दै आएका छन् भने अर्काे छोरा जागिरे छन्। ‘बुबाले थालेको चियापसललाई हामीले निरन्तरता दिँदै आएका छौं,’ कान्छा छोरा बब्लुले भने, ‘दैनिक औसतमा ३० हजार रुपैयाँभन्दा बढीको चिया बिक्री हुन्छ। स्वादिलो चिया बनाउने भएकाले एक लिटर दूधले औसतमा करिब १० कप चिया मात्रै बन्छ।’

‘बब्लु टी स्टाल’ मा एकाबिहानैदेखि बेलुकासम्म ग्राहकको भीड हुने गरेको छ। यसका ग्राहकमा पर्साका स्थानीय उद्योगी–व्यवसायी, प्रहरी प्रमुख, प्रशासक, भन्सार प्रशासकहरु र सर्वसाधारण उत्तिकै छन्। यसका अलावा वीरगञ्जमा घुम्न आएका चियापारखी पनि खोजी–खोजी ‘बब्लु टी स्टाल’ पुग्छन्।

गत चैत ८ गते शर्माकै चियापसलमा पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ सँगै उनका पार्टीका नेता कार्यकर्ता आएर पनि चिया पिउँदा निकै खुसी लागेको उनले बताए। उक्त अवसर भने जनतासँग माओवादी–हुलाकी राजमार्ग केन्द्रित मधेस जागरण अभियान अन्तर्गतको कार्यक्रमले जुराइदिएको थियो।

शर्माले वीरगंजमा आउने उच्चपदस्थ कर्मचारी तथा राजनीतिज्ञहरुले आफूले पकाएको चिया पिउँदै आइरहे पनि को को आए भनेर रेकर्ड राख्ने नगरेको सुनाए। चिया बेचेरै परिवारको जीवनयापन सहज भएको उनले बताए। रासस