काठमाडौं । नेपाल उद्योग वाणिज्य महासंघका अध्यक्ष चन्द्र प्रसाद ढकालले सरकार, राजनीतिक दल, प्रशासन र निजी क्षेत्र एउटै डुंगाका यात्री भएको बताएका छन्। उनले अर्थतन्त्र सुधारको लागि सबै पक्ष गम्भीर बन्नु पर्नेमा जोड दिएका छन्।
संंघीय मामिला तथा तथा सामान्य प्रशासन मन्त्रालयले मंगलबार आयोजना गरेको ‘संंघीय संरचनामा लगानी प्रवर्धन: सम्भावना, चुनौती र निजी क्षेत्रको अपेक्षा’ विषयका कार्यक्रममा ढकालले नेपालमा लगानीको पर्याप्त सम्भावना भए पनि सोही अनुरुपको वातावरण नहुँदा राज्यले प्रतिफल पाउन नसकेको बताएका हुन्।
उनले देश विकासका लागि लगानी प्रवर्धन आवश्यक रहेको र यसका लागि लागि सबै राजनीतिक दल, प्रशासन संयन्त्र र निजी क्षेत्र उत्तिकै जिम्मेवार हुनु पर्ने धारणा राखेका थिए।
‘सरकार, राजनितिक दल, प्रशासन र निजी क्षेत्र हामी एउटै डुंगाका यात्री हौं। डुंगामा क्षति पुग्दा एउटा पक्ष सुरक्षित र अर्को असुरक्षित भन्ने हुँदैन। यसकारण देशको अर्थतन्त्र बलियो बनाउन हामी सबै उत्तिकै जिम्मेवार छौं र हुनु पर्छ,’ उनले भने।
उनले २०७२ सालको संविधानले नेपाललाई एकात्मक प्रणालीबाट संघात्मक पद्धति रुपान्तरित गरि शासन संचालनको स्वायत्तता, सहभागिता र जवाफदेहीताको परिकल्पना गरे पनि तीनै तहका सरकारहरु सोही अनुरुप चल्न नसकेको बताएका छन्।
ढकालले लगानी प्रवर्धनका लागि राजनीतिक एवं नीतिगत अस्थिरता, संघीय सरकारका तहहरुबीचको अन्तरसम्बन्ध र समन्वयको अभाव, निजी क्षेत्र प्रोत्साहन गर्ने कार्यक्रमको कमी, विकास आयोजनामा अवरोध मुख्य चुनौती रहेको बताएका छन्।
लगानी प्रवर्धनका लागि प्रशासनिक सरलता र पारदर्शिता र सबै तहबाट लगानीको सुरक्षाको ग्यारेन्टी आवश्यक भएको बताउँदै उनले सरकार वा निजी क्षेत्रबाट प्रवर्धित पूर्वाधार एवं विकास परियोजना निर्वाध रुपमा संचालन गर्ने वातावरण बनाउनु पर्नेमा जोड दिए।
यस्तै, उनले तीनै तहका सरकार राजस्व केन्द्रित हुनु, व्यवसाय दर्ता नविकरण एवं अन्य सेवा प्रवाह चुस्त नहुनु औद्योेगिक व्यवसाय ऐनमा एकरुपता नहुने जस्ता समस्याले गर्दा अपेक्षा अनुरुप लगानी र व्यवसाय प्रवद्र्धन हुन नसकेको धारणा राखेका थिए।
ढकालले लगानीमैत्री वातावरणका लागि निजी क्षेत्रलाई प्रोत्साहन, लगानी आकर्षित गर्न प्रतिष्पर्धा, व्यवसाय दर्ता नविकरण एवं राजश्व बुझाउन डिजिटल माध्यमको प्रयोग, नागरिक एपमा व्यवसाय सम्बन्धी आइकन थपि सम्पूर्ण सुविधा दिनुपर्ने बताए।
त्यसक्रममा उनले लगानी प्रवर्धनका लागि केन्द्रको औद्योगिक व्यवसाय ऐनमा थप सुविधा दिने, घरेलु उद्योगलाई उद्योग वाणिज्य संघहरुसंग समन्वयमा सेवा विस्तार गर्नुपर्ने समेत बताएका थिए।
