अमेरिकामा टिकटक पुनः संचालनमा आएको छ। राष्ट्रपति निर्वाचित डोनाल्ड ट्रम्पले सोमबार पदभार ग्रहण गरेपछि कार्यकारी आदेश जारी गरी प्रतिबन्धलाई स्थगित गर्ने घोषणा गरेपछि टिकटक पुनः संचालनमा आएको हो।

शनिबार बेलुका टिकटकले राष्ट्रिय सुरक्षाको आधारमा लागू गरिएको प्रतिबन्धका कारण अमेरिकामा आफ्नो सेवा बन्द गरेको थियो। तर ट्रम्पले आइतबार प्रतिबन्ध कार्यान्वयनलाई स्थगित गर्दै सहमतिका लागि थप समय दिने वाचा गरे। त्यसपछि टिकटकले आफ्नो सेवा पुनःस्थापना गर्ने प्रक्रिया सुरु गरेको थियो।

सेवा पुनःसञ्चालनपछि टिकटकले आफ्ना करोडौं प्रयोगकर्ताहरूलाई देखाएको पपअप मेसेजमा ट्रम्पको नाम उल्लेख गर्दै धन्यवाद व्यक्त गरेको छ। साथै, अमेरिकामा टिकटकको सेवा कायम राख्न दीर्घकालीन समाधान खोज्न ट्रम्पसँग सहकार्य गर्ने प्रतिबद्धता समेत कम्पनीले जनाएको छ।

टिकटकका प्रमुख कार्यकारी शाउ चिउ सोमबार ट्रम्पको उद्घाटन समारोहमा उपस्थित हुने अपेक्षा गरिएको छ।

आफ्नै सामाजिक सञ्जाल ट्रुथ सोसलमा ट्रम्पले टिकटक बन्द हुन नदिन आग्रह गर्दै सोमबार कार्यकारी आदेश जारी गर्ने र प्रतिबन्ध लागू हुनुअघि थप समय दिने बताए।

टिकटकको मूल कम्पनी बाइटडान्सले प्रतिबन्ध टार्न आफ्ना अमेरिकी अपरेसनहरू बिक्री गर्नुपर्ने कानुनलाई बेवास्ता गरेको थियो। सुप्रिम कोर्टले शुक्रबार यो कानुनलाई समर्थन गर्दै आइतबारबाट लागू गरेको थियो। तर ट्रम्पले कार्यकारी आदेशमार्फत यो प्रतिबन्धलाई अस्थायी रूपमा स्थगित गर्न सक्ने बताएका छन्।

ट्रम्पको कदमले आफ्नै पार्टीभित्रको विवादलाई उजागर गरेको छ। केही रिपब्लिकन नेताहरूले टिकटकलाई प्रतिबन्धित गर्न आवश्यक रहेको बताउँदै आएका छन्। तर ट्रम्पले सहमतिका लागि समय दिनुपर्ने तर्क राखेका छन्।

सेवा पुनःसञ्चालन भए पनि यसलाई होस्ट गर्ने प्लेटफर्महरूले कानुनी चुनौतीहरूको सामना गर्नुपर्ने सम्भावना रहेको बताइएको छ।

कानुन विशेषज्ञहरूले ट्रम्पको कार्यकारी आदेशले कानुनको वैधता बदल्न नसक्ने र यसले थप कानुनी विवाद सिर्जना गर्ने सम्भावना रहेको बताएका छन्। तर ट्रम्पले टिकटक प्रतिबन्धलाई ९० दिनसम्म स्थगित गर्न सक्ने कानुनी अधिकार भए पनि यसका लागि ठोस प्रमाण आवश्यक पर्नेछ।

ट्रम्पको कार्यकारी आदेशको प्रतीक्षामा टिकटकका प्रयोगकर्ताहरूले अहिलेको सेवालाई अस्थायी राहतको रूपमा लिएका छन्। यसले आगामी दिनहरूमा टिकटकको भविष्यबारे अझ स्पष्टता ल्याउनेछ।